“Bu birlik bütövlükdə Avrasiyada sülhün təminatına mühüm töhfələr verəcək”, C.Feyziyev

  Azərbaycan Milli Elmlər Akademiyasının önündəki Elmlər Parkında H.Əliyevin 100 illiyinə həsr olunmuş II Türk Dünyası Ədəbiyyat və Kitab Festivalı öz işinə başlayıb. Builki festivalda müxtəlif ölkələrdən nümayəndələr də olub.

  Açılış mərasimində Azərbaycan Yazıçılar Birliyinin sədri, yazıçı Anar, Milli Elmlər Akademiyasının vitse-prezidenti Dilqəm Tağıyev, millət vəkilləri Qənirə Paşayeva, Sabir Rüstəmxanlı, Cavanşir Feyziyev və başqaları çıxış ediblər.

  Daha sonra ayrı-ayrı müəlliflərin kitabları təqdim olunub.

  Millət vəkili Cavanşir Feyziyevin “Türk dünyası” adlı 5 cildliyi tanınmış yazıcı və şair Əkbər Qoşalı tərəfindən təqdim edilib. Ə.Qoşalı C.Feyziyevin müəllifi olduğu 5 cilddən ibarət “Türk sivilizasiyasının təməl dəyərləri”, “Türk xalqları”, “Türk dövlətçiliyi tarixi”, “Türkşünaslıq” və “Türk dünyasının tanınmış şəxsiyyətləri” kitablarının müxtəlif ölkələrdə 8 dildə nəşr olunduğunu, bütün türk dünyasında maraqla qarşılandığını bildirib və kitabların məzmunu ilə bağlı məlumat verib.

  Ədəbiyyat və Kitab Festivalının əhəmiyyətini diqqətə çatdıran Cavanşir Feyziyev türk dünyasının keçmişi, bu günü və gələcəyi ilə bağlı fikir və ideyalarını tədbir iştirakçılarına çatdıraraq deyib: “1991-ci ildə müstəqilliyimizin bərpası ilə açılan yalnız fiziki-coğrafi sərhədlərimiz deyildi. Bərpa etdiyimiz müstəqillik həm də 70 il ərzində qarşımıza çəkilmiş mədəni-mənəvi buxovları, ədəbi-bədii yaradıcılıq sınırlarını aradan qaldırdı və türk dünyasının öz mənəvi birliyinə qovuşmasını təmin etdi. İndi Türk dünyasının ən qabaqcıl fikir adamları, söz sahibləri, sənət xadimləri və bütün ziyalılar bu birliyin çağdaş dövrün tələblərinə uyğun yenidən şəkillənməsinə böyük töhfələr verirlər. Bugünkü kitab festivalı da bu cür fəaliyyət dairələrinin genişləndirilməsinə xidmət edir.”

  Millət vəkili onu da qeyd edib ki, 2009-cu ildən bəri mövcud olan Türk Şurasının əsasında 2021-ci ildə yaranmış Türk Dövlətləri Təşkilatını ümumtürk inteqrasiya proseslərində keçid mərhələsi hesab edir. C.Feyziyev deyib: “Son məqsəd təkcə mədəni-mənəvi qovuşma və ədəbi-bədii yaradıcılıq əməkdaşlığı deyil, həm də siyasi, iqtisadi və hərbi inteqrasiyanı özündə ehtiva edən Türk Dövlətləri Birliyinin yaradılmasıdır. Belə bir birlik türk xalqlarının qlobal miyasda siyasi, iqtisadi və hərbi güc mərkəzinə çevrilməsinə və bütün türk xalqlarının təhlükəsizliyinin etibarlı şəkildə təmin olunmasına gətirib çıxaracaq, eləcə də bütövlükdə Avrasiyada sülhün və təhlükəsizliyin təmin edilməsinə mühüm töhfələr verəcək.”

  “Türk dünyası” 5 cildlik kitablar toplusu festival iştirakçıları tərəfindən böyük maraqla qarşılanıb.