Türkiyə yolun sol zolağına keçmək istəyir

  Almaniyanın “Frankfurter Allgemeine Zeitung” qəzeti Türkiyə avtomobil sənayesinin yeni tip koronavirus (Covid-19) epidemiyasından sonra qlobal mövqeyini gücləndirməyə çalışdığından yazıb. Qəzet “Türkiyə yolun sol zolağına keçmək istəyir" başlıqlı məqaləsində ölkənin elektrikli maşınları və ekoloji elektrik sektoruna diqqəti çəkərək yazıb: "Türkiyənin avtomobil sənayesi “Covid-19”dan sonra qlobal mövqeyini gücləndirməyə çalışır. Türkiyə Avtomobil Sənayesi İxracatçıları Birliyinin (Otomotiv Endüstrisi İhracatçıları Birliği - OİB) sədri Baran Çelikin sözlərilə desək, ölkə dünyanın ən böyük 10 avtomobil istehsalçısı arasına girmək istəyir.

  Türkiyə hal-hazırda təxminən 1,3 milyon maşın istehsal edir. Bu, Fransadan sonra, Çexiyadan isə əvvəl deməkdir. 14-cü sırada olan Türkiyə böyüklərin olduğu ilk 10-luqda olmaq üçün istehsalını yarıbayarı artıraraq bu rəqəmi ildə iki milyona çıxarmalıdır. OİB-in sədri bunu reallaşdıra biləcəklərini deyir. Belə ki, Baran Çelikin sözlərinə görə, “Türkiyədə 2017-ci ildə təxminən 1,7 milyon avtomobil istehsal edildi. 14 marka maşınımız var. E-mobildə Türkiyə avtomobil sektorunu sürətləndirəcək, istehsal həcmini 2,4 milyon avtomobilə çıxara biləcəyik”.

  5 Türkiyə şirkəti 3 milyard avronu keçən sərmayə və hökumətin dəstəyilə 2018-ci ildə TOGG-u (Türkiyənin Avtomobili Müəssisəsi Qrupu - Türkiye Otomobili Girişim Grubu) yaratdı və 2022-ci ilin sonunda onu bazara çıxaracaq.

  Türkiyədə böyük avtomobil layihələri var”.