Bakıda keçiriləcək İslam Həmrəyliyi Oyunları üçün heyət açıqlanıb

Futbol üzrə Türkiyə yığmasının Bakıda keçiriləcək İslam Həmrəyliyi Oyunları üçün heyəti açıqlanıb.  Türkiyə Futbol Federasiyasının məlumatına görə, “ay-ulduzlular”a 23 futbolçu dəvət edilib.

Komanda mayın 2-də Beykoz-Rivada yerləşən “Hasan Doğan” təlim-məşq mərkəzində bir araya gələcək. 3 günlük hazırlıqdan sonra türklər mayın 5-də Bakıda olacaqlar.

“23-lük”də cəmi 1 futbolçu 23 yaşdan yuxarıdı. Bu, “Zonquldak Kömürspor”un yarımmüdafiəçisi Onur Erişdi. Həmçinin “Qalatasaray”, “Beşiktaş” və “Fənərbaxça”dan da 1 nəfər heyətdə yer alıb.

Qeyd edək ki, İslamiadada B qrupunda mübarizə aparacaq Türkiyə yığması mayın 8-də Əlcəzair, 11-də Oman, 15-də isə Fələstinlə üz-üzə gələcək.