İsrail ordusunun Qəzzaya hücumlarında ölənlərin sayı artmaqda davam edir

İsrail ordusunun 7 oktyabr 2023-cü il tarixindən etibarən Qəzza zolağına həyata keçirdiyi hücumlarda ölənlərin sayı 44 min 612-yə yüksəlib.

Qəzzada Fələstin Səhiyyə Nazirliyindən verilən açıqlamada İsrailin Qəzza zolağına 427 gündür hücumları ilə bağlı məlumat verilib.

İsrail ordusunun Qəzza zolağının müxtəlif bölgələrində son 24 saatda həyata keçirdiyi “3 qətliam”da 32 nəfərin həyatını itirdiyi, 95 nəfərin isə yaralandığı bildirilib.

Qeyd edilib ki, İsrailin Qəzza zolağına 2023-cü il oktyabrın 7-dən bu yana həyata keçirdiyi hücumlarda ölənlərin sayı 44 min 612, yaralıların sayı isə 105 min 834-ə yüksəlib.

Bəyanatda həmçinin dağıntılar altında və yol kənarında hələ də ölənlərin olduğu, lakin İsrail qüvvələrinin maneəsi üzündən tibb qruplarının və mülki müdafiə işçilərinin cəsədlərə çata bilmədiyi bir daha vurğulanıb.

Ümumdünya Səhiyyə Təşkilatının (ÜST) Fələstin nümayəndəsi Rik Peeperkorn Birləşmiş Millətlər Təşkilatının Cenevrə Ofisinin həftəlik mətbuat konfransında onlayn olaraq iştirak edib və vəziyyəti qiymətləndirib.

İsrail ordusunun Qəzzanın şimalına qurudan hücumlarının davam etdiyini və bunun səhiyyə xidmətlərinə çıxışı əngəllədiyini qeyd edən Peeperkorn "Kamal Advan, Əl-Avde və İndoneziya xəstəxanalarına giriş ciddi şəkildə məhdudlaşdırılıb. Kritik tibbi ləvazimatlar, yanacaq və qan tapılmasında problemlərin olduğu bildirilir" deyib.

Peeperkorn ÜST-nin Qəzza missiyalarının İsrailin hücum və müdaxilələrindən ciddi şəkildə təsirləndiyinə diqqət çəkərək, "2023-cü ilin oktyabrı ilə 4 dekabr 2024-cü il tarixləri arasında ÜST-nin liderliyində Qəzzada planlaşdırılan 273 missiyanın 58 faizi rədd edildi, ləğv edildi və ya bloklandı" deyə bildirib. 

O, Qəzzadakı ən azı 12 min xəstənin sağ qalmaq üçün tibbi təxliyəyə ehtiyacı olduğunu vurğulayıb.