İsrail ordusu Qəzzanın müxtəlif bölgələrini hədəfə alıb

İsrailin Qəzzanın müxtəlif bölgələrini hədəfə aldığı hücumlarda 4-ü uşaq olmaqla 25 fələstinli həyatını itirib.

Fələstinin WAFA xəbər agentliyinin məlumatına görə, İsrail ordusu Qəzza zolağının mərkəzi hissəsindəki Deyr əl-Bələh şəhərindəki Bureyc qaçqın düşərgəsinə didərgin düşmüş fələstinlilərin sığındıqları Birləşmiş Millətlər Təşkilatının (BMT) məktəbini hədəf alıb.

BMT-nin Orta Şərqdəki Fələstinli Qaçqınlara Yardım və İşlər üzrə Agentliyinin (UNRWA) nəzdində fəaliyyət göstərən Əbu Hemise məktəbinin İsrail ordusu tərəfindən hədəfə alınması nəticəsində 3 fələstinli ölüb, çoxlu sayda insan yaralanıb.

İsrailin hücumu nəticəsində məktəbdə yanğın baş verib, fələstinli ailələrin qaldığı 15 çadır yanıb.

Qəzzanın cənubundakı Rəfah şəhərində həkim qrupları dünən İsrail ordusunun şəhərin şərqində fələstinliləri hədəf alması nəticəsində həyatını itirən 9 fələstinlinin cəsədini tapıb.

Mülki Müdafiə Müdirliyindən verilən açıqlamada İsrail ordusunun Qəzza şəhərində bir evi hədəf alması nəticəsində 3 fələstinlinin həyatını itirdiyi, çox sayda insanın isə yaralandığı bildirilib.

İsrail ordusunun Nusayrat qaçqın düşərgəsinə mülki şəxslərə silahlı pilotsuz uçuş aparatı (PUA) ilə atəş açması nəticəsində 4-ü uşaq olmaqla 5 fələstinli həyatını itirib.

İsrail ordusunun Qəzza zolağının şimalında etnik təmizləmə apardığını bildirən şahidlər şimaldakı Beyt Lahiyadakı bir evə hava hücumu nəticəsində eyni ailədən 5 nəfərin öldüyünü bildirib.