İsrail ordusu Qəzza zolağına ağır zərbələr endirməyə davam edir

İsrailin Qəzza zolağına hücumları nəticəsində 7 nəfər həyatını itirib. Şahidlərin verdiyi məlumata görə, İsrailə məxsus pilotsuz uçuş aparatı (PUA) Qəzza zolağının şimalındakı Beyt Lahiya qəsəbəsində dinc sakinləri hədəf alıb. Hücum nəticəsində 3 nəfər ölüb, bir neçə nəfər isə yaralanıb.

İsrail ordusu Beyt Lahiyada mülki şəxslərin sığındığı məktəb yaxınlığına hücum təşkil edib. Bu hücum nəticəsində iki nəfər həyatını itirib. Bundan əlavə, İsrail döyüş təyyarələrinin Beyt Lahiya və Cibaliyada mülki şəxslərə aid bəzi binaları partlatdığı bildirilib.

Əl-Karuş ailəsinin Qəzzanın cənub-qərbindəki evinin də bombalandığı açıqlanıb. Hücum nəticəsində ölən, yaralanan və dağıntılar altında qalanların olduğu qeyd edilib.

Səhiyyə mənbələrinin verdiyi məlumata görə, bir neçə həftə əvvəl İsrail ordusunun Qəzza şəhərinin qərbindəki Əl-Şati qaçqınlar düşərgəsindəki Əbu Asi məktəbini bombalaması nəticəsində yaralanan fələstinli qadın həyatını itirib.

Qəzzanın cənubundakı səhiyyə mənbələri İsrailin Rəfah şəhərinin Ən-Nəsr qəsəbəsinə təşkil etdiyi hücumda həyatını itirən və yaralananların Xan Yunusdakı Qəzza-Avropa Xəstəxanasına aparıldığını bildirib.

Mülki müdafiə qrupları, İsrail döyüş təyyarələrinin Qəzzanın mərkəzi hissələrindəki Deyr əl-Belah şəhərində bir evə hücumu nəticəsində yaralananların olduğunu qeyd edib. İsrail ordusu, Rəfah şəhərinin şərqindəki Əl-Cenine rayonunda mülki şəxslərə məxsus bəzi binaları da partladıb.