Almaniya müsəlmanlara qarşı münasibətdə sinifdə qaldı

  Birləşmiş Millətlər Təşkilatının məlumatına görə, Almaniya müsəlmanlara qarşı ayrı-seçkiliklə mübarizə apara bilməyib.

  BMT-nin İrqi Ayrı-Seçkiliyin Aradan Qaldırılması üzrə Komitəsinin (CERD) yekun hesabatı İsveçrənin Cenevrə şəhərində dərc olunub.

  Məlumata görə, Almaniya müsəlmanlara qarşı düşmənliklə mübarizə apara bilməyib. Çünki bu ölkə keçmişdə irqçiliyə qarşı kifayət qədər tədbir görməyib.

  BMT-nin yekun hesabatına görə, Almaniyada müsəlman qadınlar etnik, cinsi və dini mənsubiyyətlərinə görə ayrı-seçkiliyə məruz qalırlar. Məsələn, dövlət sektorunda hicablı geyinmək cəzalandırılmamalıdır.

  Ehtiyat tədbiri olaraq, komitə müsəlmanlara qarşı düşmənlik əleyhinə federal komissar təyin etməyi məsləhət görür.

  BMT-nin komitəsi həmçinin Fələstin tərəfdarı olan dinc nümayişlərə qadağa qoyulmasından da narahatlığını bildirib. Çünki bu nümayişlərin məqsədi fələstinlilərin tarixi sürgününü xatırlamaq və Qəzza xalqına dəstək olmaqdır.

  Hesabatda ekspertlər Almaniyadakı ekstremist qruplarla bağlı da narahatlıqlarını ifadə ediblər. Bunlara ifrat sağçı ideologiyaya malik Almaniya üçün Alternativ Partiyası (AfD) da daxildir. CERD-ə görə, irqçi nifrəti qızışdıran təşkilatların yaradılmasının qarşısı alınmalıdır.