Fələstin Su İdarəsi xəbərdarlıq edib

Fələstin Su İdarəsi İsrailin Qəzza zolağında ''Həmas'' tərəfindən inşa edilən tunellərə dəniz suyu dolduracağı təqdirdə bunun ekoloji fəlakətə səbəb olacağı ilə bağlı xəbərdarlıq edib.
İdarədən verilən  açıqlamada dəniz suyunun tunellərə doldurulmasının xüsusilə yeraltı sular üçün böyük təhlükə yaradacağı və bunun bərpasının mümkün olmayacağı bildirilib.
Açıqlamada İsrailin belə bir addım atmasının Qəzza zolağındakı yeraltı su anbarına ciddi  təsiri olacağı vurğulanıb və yeraltı sularda duzluluq nisbətlərində görünməmiş bir artımın olacağı bildirilib. Açıqlamada rayonun bir çox bölgəsində çökmələrin baş verəcəyi və qalan evlərin və infrastrukturun məhv olacağı qeyd olunub.
Açıqlamada həmçinin Qəzza zolağının bütün ərazisini əhatə edən sahilyanı yeraltı su anbarının şəhərin əsas su mənbələrindən biri olduğu və vətəndaşların bütün su ehtiyaclarını buradan qarşıladıqları vurğulanıb.