Pensiya yaşını 62-dən 64-ə çıxaran qanun layihəsi gərginliyi artırıb

  Fransanın paytaxtı Paris növbəti dəfə hadisələrə səhnə olub: ölkə prezidenti Emmanuel Makronun pensiya yaşını 62-dən 64-ə qaldıran qanun layihəsi gərginliyi artırıb.

  Bu dəfə küçələrə çıxanların əksəriyyəti gənclər olub.

  Fransanın hər yerini nümayişlər və etirazlar bürüyüb.

  Yanvarın 19-dan başlayan tətillər həyatı dondurub: qatarların hərəkəti dayanıb, məktəblərdə təhsilə ara verilib.

  Fransa Daxili İşlər Nazirliyinin məlumatına görə, son 3 gündə 1 milyondan çox adam küçələrdə etiraz aksiyasına qoşulub.

  Parisdəki nümayişlərə 5 mindən çox polis məmuru cəlb olunub. Nümayişlərdə 40-dan çox fəal saxlanılıb.

  Həmkarlar İttifaqı E.Makron qanun layihəsini geri götürənə qədər nümayişlərin və tətillərin davam edəcəyini bildirib.