İsveçdə Quranın yandırılmasına qarşı kütləvi etirazlar davam edir

  İsveçin bir neçə şəhərində antiislam aksiyasına cavab olaraq kütləvi iğtişaşlar üç gündür davam edir.

  Danimarkalı ekstremist sağçı partiya “Ştram Kurs”un sədri Rasmus Paludanın Quranı yandırması bir neçə şəhərdə etirazlarla qarşılanıb. Etiraz edənlər Norrşöpinq, Linşöpinq, paytaxt Stokholm və Örebro şəhərlərinin küçələrinə toplaşıblar. Aksiyalar polislə kütləvi toqquşmalar ilə müşayiət olunub. Hətta etirazçılardan biri avtomobili çevik qüvvələrin üzərinə sürüb. Sürücü həbs edilib və qəsdən adam öldürməyə cəhd maddəsi ilə mühakimə olunacaq.

  Malmödə etirazçılar təkər və yol kənarında olan müxtəlif avtomobilləri və bir avtobusu yandırıb.

  Norşöpinq şəhərində bazar günü toqquşmalarda daş-qalaq olunan polis qüvvələri rezin güllələr ilə etirazçılara atəş açıb. Hadisə nəticəsində azı üç nəfər aksiyaçının xəsarət aldığı deyilir, bir nəfər isə ayağından güllə yarası ilə xəstəxanaya çatdırılıb.

  Üç gün davam edən iğtişaşlar nəticəsində onlarca polis əməkdaşının xəsarət aldığı bildirilir, bir neçə aksiyaçı da saxlanılıb.

  İsveçin İrandakı səfirliyinin müvəqqəti işlər vəkili Xarici İşlər Nazirliyinə çağırılıb və ona etiraz bildirilib.

  Aprelin 16-da Danimarkanın radikal sağçı “Stram Kurs” partiyasının sədri Rasmus Paludan İsveçin paytaxtı Stokholmda polisin mühafizəsi ilə Quranı yandıraraq videoçəkiliş təşkil edib və sosial şəbəkələrdə paylaşıb. Müqəddəs kitabın yandırılmasına mane olmaq istəyən insanlar polisin müqaviməti ilə qarşılaşıblar. Bundan sonra polis ilə insanlar arasında gərginlik yaşanıb.

  Müvəqqəti işlər vəkilinin nəzərinə çatdırılıb ki, müqəddəs kitabın yandırılması dünyada islam dininə ibadət edən 1 milyarddan artıq insanı təhqir etmək deməkdir. Müqəddəs Ramazan ayında bu hadisənin törədilməsi sonu heç də yaxşı olmayan hadisələrə yol aça bilər. Bununla əlaqədar olaraq İran hökuməti İsveç hökumətindən bu kimi hallara son qoymağı tələb edir.

  Diqqətə çatdırılıb ki, ifadə azadlığı adı altında baş verən bu kimi addımların qarşısı alınmalı və dinlərarası dialoqa kölgə salınmamalıdır.

  İsveçin müvəqqəti işlər vəkili İran hökumətinin etirazını öz hökumətinə çatdıracağını bildirib.

Mənbə: Azərtac