Cənubi Koreya - ASEAN xüsusi sammiti
Tərəflər ASEAN liderliyindəki mexanizmlərdən də istifadə etməklə Koreya yarımadasının tamamilə nüvə silahsızlaşdırılmasını və davamlı sülhün təminatını dəstəkləmək üçün dialoq və tərəfdaşlığı dərinləşdirməyi qərara alıblar.
Cənubi Koreyanın Pusan şəhərində Cənubi Koreya - ASEAN (Cənub-Şərqi Asiya Dövlətləri Assosiasiyası) xüsusi sammiti işə başlayıb.
Cənubi Koreya və ASEAN-a üzv olan 9 ölkə başçısının iştirak etdiyi sammitə Kambocanın baş naziri ailə üzvlərindən birinin səhhəti ilə əlaqədar qatıla bilməyib.
İclasın sonunda "Sülh, tərəqqi və tərəfdaşlıq naminə birgə bəyannamə" qəbul olunub. Bu sənəd Cənubi Koreyanın ASEAN ölkələri ilə gələcək əməkdaşlığı üçün, xüsusən prezident Mun Ce-İnin "Yeni cənub siyasəti 2.0" adlı kampaniyası dövründə çərçivə rolunu oynayacaq.
Tərəflər ASEAN liderliyindəki mexanizmlərdən də istifadə etməklə Koreya yarımadasının tamamilə nüvə silahsızlaşdırılmasını və davamlı sülhün təminatını dəstəkləmək üçün dialoq və tərəfdaşlığı dərinləşdirməyi qərara alıblar. Sənəddə ASEAN-ın Koreya yarımadasında sülhün və sabitliyin təminatında konstruktiv rol oynamağa hazır olduğu qeyd edilib. Bundan başqa, tərəflər transmilli cinayətkarlıq, terrorizm, ekstremizm də daxil olmaqla təhlükəsizlik təhdidlərinə qarşı, habelə regionda rəqəmsal iqtisadiyyatın inkişafı üçün kibertəhlükəsizlik sahəsində əməkdaşlığı daha da möhkəmləndirməyi qərara alıblar.
Cənubi Koreya və ASEAN ümumi inkişaf üçün, xüsusən də ticarət və investisiya, kiçik və orta biznes, startaplar sahəsində də iqtisadi əməkdaşlığı artıracaqlar. Onlar davamlı inkişaf və ətraf mühitin qorunması sahəsində əməkdaşlığın möhkəmləndirilməsi üçün hədəf müəyyən ediblər.
Cənubi Koreyanın prezidenti Mun Ce-İn sammitdəki çıxışında ölkələrin protektionizm və transmilli cinayətkarlıq da daxil olmaqla yeni təhdidlərlə qarşılaşdıqlarını, bunların öhdəsindən isə yalnız əməkdaşlıq və həmrəylik sayəsində gəlməyin mümkün olduğunu deyib.
Qeyd edək ki, Cənubi Koreya prezidenti Mun Ce-İn 2017-ci ilin noyabrında hökumətinin əsasən ASEAN ölkələri ilə strateji əlaqələrini yeni səviyyəyə qaldırmağı hədəfləyən "Yeni cənub siyasəti"ni elan edib. O, artıq ASEAN-ın 10 ölkəsinə rəsmi səfər edərək özünün regional təşəbbüsünə bağlı olduğunu göstərib. Sammit çərçivəsində Mekonq çayının keçdiyi Kamboca, Laos, Myanma, Tailand və Vyetnamın daxil olduğu "Mekonq beşliyi" - Cənubi Koreya Zirvə Görüşü də təşkil olunacaq.
Mənbə: azertag.az
Әlaqәli Xәbәrlәr
Cozep Borrell Devid Kameronla görüşüb
Bu barədə Cozep Borrell rəsmi ''X'' internet səhifəsində etdiyi paylaşımda bildirib.