Argentinada ABŞ vә Türkiyә prezidentlәrinin görüşü olacaq

Amerika Birlәşmiş Ştatlarının prezidenti Donald Trampın Argentinada keçirilәcәk G-20 sammiti çәrçivәsindә Türkiyә Prezidenti Rәcәb Tayyib Әrdoğanla görüşәcәyi bildirilir.

Ağ Evin milli tәhlükәsizlik mәsәlәlәri üzrә mәslәhәtçisi Con Bolton (John Bolton)  Donald Trampın Argentinada keçirilәcәk G-20 sammitindә Rәcәb Tayyib Әrdoğanla görüşәcәyini deyib.

Ağ Evdә keçirilәn mәtbuat konfransında çıxış edәn Con Bolton ABŞ prezidenti Donald Trampın G-20 sammiti çәrçivәsindә keçirәcәyi ikitәrәfli görüşlәri ilә bağlı mәlumat verib.

Con Bolton Trampın sammit çәrçivәsindә Türkiyә, Argentina, Çin, Rusiya, Almaniya, Yaponiya, Hindistan vә Cәnubi Koreya liderlәri ilә ikitәrәfli görüş keçirәcәyini deyib.

Sәudiyyәli jurnalist Camal Xaşoqçi cinayәtindәn sonra Donald Trampın Mәhәmmәd ibn Salmanla Argentinada görüşüb-görüşmәyәcәyi ilә bağlı sualı cavablandıran Bolton deyib: ‘‘Donald Tramp ilә Salman ibn Әbdülәziz arasında görüş olmayacaq’’.

Con Bolton  jurnalistlәrin Camal Xaşoqçi öldürülәn zaman qeydә alınan sәs yazısını dinlәyib-dinlәmәdiyi ilә bağlı sualını   isә belә cavablandırıb: ‘‘Dinlәmәdim. Qeydә alınan sәs yazısı әrәb dilindә olduğu üçün başa düşә bilmәzdim. Sәs yazısının tәrcümә edilmiş variantını oxudum’’.

Mәtbuat konfransında çıxış edәn Ağ Evin mәtbuat katibi  Sarah Sanders (Sarah Sanders)  isә jurnalistlәrin Trampın Argentinada  rәsmi görüşlәri çәrçivәsindә Salman ibn Әbdülәzizlә görüşüb-görüşmәyәcәyi ilә bağlı sualını cavablandıraraq deyib: ‘‘Xaşoqçi cinayәti ilә bağlı aparılan istintaqın yekun nәticәsini görmәmişik’’.

Qeyd edәk ki,  sәudiyyәli jurnalist Camal Xaşoqçi Sәudiyyә Әrәbistanının İstanbuldakı konsulluğunda vәhşicәsinә öldürülmüşdü.