Mahmud Abbas BMT Baş katibi ilə görüşdü

 Fələstin hökumətinin rəhbəri Mahmud Abbas Fələstinin BMT-nin Baş Qərargahında inkişaf etməkdə olan ölkələrin yaratdığı G77+Çin Qrupunun sədrliyini təhvil alacağı tədbirdən əvvəl BMT Baş katibi Antonio Quterreş ilə (Antonio Guterres) görüşdü.
 
 Abbas mətbuata qapalı keçirilən görüşdən sonra jurnalistlərin Fələstinin BMT-yə tam üzvlük üçün müraciət edib-etməyəcəyi barədə verdikləri suala cavab vermədən BMT-nin Baş Qərargahını tərk etdi.
 
 Abbası müşayiət edən Fələstinin BMT-dəki daimi nümayəndəsi Riyad Mənsur isə Abbas və Quterreş görüşünün çox yaxşı keçdiyini bildirdi.
 
 Abbas BMT-nin 73-cü Baş Məclisinin sədri Mariya Fernanda Espinosa ilə də görüşdü.
 
 Qeyd edək ki, BMT Baş Məclisi oktyabr ayında Fələstinin inkişaf etməkdə olan ölkələrin yaratdığı G77+Çin Qrupunun sədri olmasına dəstək verən qətnamə qəbul etmişdi.
 
 146 üzv ölkə Fələstinin sədrliyinin lehinə, Amerika Birləşmiş Ştatları, İsrail və Avstraliya isə əleyhinə səs vermişdilər.
 
 BMT üzvü olmayan Fələstin G77+Çin Qrupunun sədri kimi qrup adından bəyanat verərkən və təkliflər edərkən üzv ölkə kimi hərəkət edə biləcək və cavab vermə hüququndan istifadə edəcək.
 
 BMT Baş Məclisi 2012-ci ildə Fələstinin "müşahidəçi quruluş"  statusunun "üzv olmayan müşahidəçi dövlət" statusuna yüksəldilməsinə qərar vermişdi.
 
 Bu qərarla Fələstin BMT Baş Məclisindəki bəzi səsvermələrə və BMT nəzdindəki beynəlxalq təşkilatlara qoşulmaq hüququ qazanmışdı.