اردوغان: تورکیه گه خدمت قیلیش گه دوام ایته میز

تورکیه جمهوریتی جمهوررئیسی رجب طیب اردوغان تورکیه پارلمانیده قسم یاد قیلیب وظیفه سی گه باشله شی آرتیدن تورکیه نینگ اساسچی سی مصطفی کمال اتاتورک نینگ دفن قیلینگن آنیت قبر گه باردی.

جمهوررئیس اردوغان آنیت قبر کتابی گه, "کیله جکده گی بیش ییل دوامیده تورکیه عصری مفکوره سی نی تطبیق ایتیش اوچون کونگیلدن فعالیت یوریتیش گه دوام ایته میز" دییه قید ایتدی. 

کیین اردوغان, وظیفه گه باشلش مراسمی اوچون جمهوررئیسلیک مجتمع سی گه باردی. 

خوددی شوو ییرنینگ اوزیده قیلگن معروضه سیده, "تورکیه گه خدمت قیلیش گه دوام ایته میز.  قیسی سیاسی مفکوره, دین و مذهب گه منسوب بولیشی گه قره مسدن, 85 میلیون کیشی نینگ همه سی نی اوز بغری میز گه باسه میز. تورکیه نینگ, 85 میلیون نفوسی نینگ همه سی نینگ بیر دیوار نینگ خشت لری کبی بیر بیر لری بیلن بیرله شیش لری هر وقت دن کوپراق ضروری دیر" دییه قید ایتدی. 

ناتو عمومی منشی ینس استولتنبرگ, ونزوئلا دولت رهبری نیکولاس مادورو, آذربایجان جمهوررئیسی الهام علی اف و پاکستان باش وزیری شهباز شریف بیلن ارمنستان باش وزیری نیکول پاشینیان هم جمهوررئیس اردوغان نینگ پارلمانده گی قسم یاد قیلیش مراسمی گه اشتراک قیلدی. 

قسم یاد قیلیش مراسمی گه سومالیا و الجزایر بیلن بالکان اولکه لری دن هم دولت باشلیق لری قتنشدی. 

مراسم گه بعضی اولکه لرنینگ تشقی ایش لر وزیرلری قتنشرایکن, امریکا قوشمه ایالتلری  نامیدن جمهوررئیس اردوغان نینگ قسم یاد قیلیش مراسمی گه ایلچی جیفری فلیک اشتراک قیلدی. روسیه تامانیدن فدرال مجلس دولت دوما باشلیغی ویاچیسلاو وولودین قتنشدی.