تورکیه ده بیر میلیون دن آرتیق کیشی کرونا ویروس گه قرشی ایملندی

واکسیناسیون پروسه سی 14 جنوری ده باشله دی

1569927
تورکیه ده بیر میلیون دن آرتیق کیشی کرونا ویروس گه قرشی ایملندی

تورکیه نینگ 81 ولایتی ده 14 جنوری ده باشله گن واکسیناسیون پروسه سی دایره سیده 1 میلیون 200 مینگ دن آرتیق کیشی ایملندی. 

تورکیه دارو- درمان و طبی تجهیزات اداره سی تامانیدن تطبیق ایتیلیشی گه اجازت بیریلیشی آرتیدن بیرینچی نوبت ده تورکیه جمهوریتی ساغلیق نی سقلش وزیری فخرالدین کوجه و کیین ایسه کرونا ویروس بیلیم کینگشی اعضا لری ایملندی. 

شونده ی قیلیب 14 جنوری  ده تورکیه سطحی ده واکسیناسیون پروسه سی ساغلیق پرسونلی بیلن باشله گن بولدی.

اوشبو دایره ده 14 جنوری ده تورکیه جمهوریتی جمهوررئیسی رجب طیب اردوغان کرونا ویروس گه قرشی ایملندی. 

بیرینچی کونده 285 مینگ و ایککینچی کونده ایسه 500 مینگ دن آرتیق ساغلیق پرسونلی نینگ ایملنگن لیگی بیلدیریلدی. 

جاری آی نینگ 20- کونیده ایسه تورکیه بویلب ایملنگن کیشی لر سانی نینگ 1 میلیون دن آشگن لیگی معلوم قیلیندی. 

شونده ی قیلیب حاضرگی کون گه قدر تورکیه ده 1 میلیون 200 مینگ دن آرتیق کیشی ایملندی. 



علاقه لی ینگی لیکلر