رجب طیب اردوغان ابراهیم رئیسی بیلن سوزله شدی

تورکیه جمهوریتی جمهوررئیسی رجب طیب اردوغان, تلفن آرقه لی, ایرانلیک کسبداشی ابراهیم رئیسی بیلن سوزله شدی. 

تورکیه جمهوررئیسلیک علاقه باشقرمه سی تامانیدن بیریلگن بیاناتگه کوره, صحبتده, تورکیه بیلن ایران اورته سیده گی مناسبتلر و اسرائیل نینگ مسجدالاقصی گه قره تیلگن حمله لری داخل منطقه مقیاسیده گی ینگیلیکلر باره سیده بحث ایتیلدی. 

جمهوررئیس اردوغان, اسرائیل نینگ مسجدالاقصی و فلسطین نینگ باشقه جای لریده کونساین آرتیب باریاتگن انسانلیککه سیغمه یدیگن حمله لری گه قرشی اسلام دنیاسی نینگ متحد بولیشی نینگ اهمیتی گه دقت قره تدی. 

ینی زوروانلیک لرنینگ آلدی نینگ آلینیشی اوچون یخشی نیت نینگ حاکم بولیشی کیره ک ایکن لیگینی بیلدیرگن اردوغان, برچه تامان لرنی معقول بیر سیاست گه آلیب باره دیگن تشبث لر قیلیشی نینگ فایده لی بوله دیگن لیگینی ایسله تیب اوتدی. 

اسلام همکارلیک تشکیلاتی و بیرلشگن ملتلر تشکیلاتی داخل, خلق ارا پلاتفرملرده مقدس جای لرنینگ موقفی نینگ اسره لیشی اوچون اورتاق سعی و حرکت لر قیلینیشی کیره ک ایکن لیگینی بیلدیرگن اردوغان, اوشبو همکارلیک نینگ اوروپا نینگ فرقلی شهرلریده, اینیقسه تورکیه سفارت لری آلدیده, سونگّی پیتلرده قرآن کریم نی یاقیب یوباریش فعالیت لری گه قرشی سیده هم بحث موضوعی بولیشی نینگ مهم ایکن لیگینی معلوم قیلدی.