تورکیه سمرقند ده باش قونسلگرلیک آچه دی

تورکیه جمهوریتی اوزبیکستان نینگ سمرقند شهریده باش قونسلگرلیک آچه دی. 

تورکیه نینگ تاشکینت ایلچیسی اولغَن بیکار, اوشبو توغریده بیرگن بیاناتیده, "تورکیه جمهوریتی, اوزبیکستان نینگ مستقل لیگی نی میلادی 1991- ییلده بیرینچی بولیب تن آلگن اولکه اوله راق تاشکینت ده ایچلیلیک آچگن بیرینچی دولت دن عبارت بولدی. اوشبو تاریخی مسئولیت دایره سیده تورکیه, اوزبیکستان ده باش قونسلگرلیک آچیش بوییچه بیرینچی اولکه بولیش گه قرار قیلدی" دییه قید ایتدی. 

تورکیه نینگ اوزبیکستان ده گی ینگی ایلچی سی اوله راق تعینلنگن بیکار, تورکیه جمهوریتی تشقی ایش لر وزیری مولود چاووش اوغلی نینگ اشتراکی بیلن 7 مارچ کونی آچیله دیگن سمرقند باش قونسلگرلیگی توغریسیده بیانات بیردی. 

بیکار, تورکیه بیلن اوزبیکستان اورته سیده گی مناسبت لر بوییچه ایککی اولکه رهبرلری رجب طیب ایردوغان و شوکت میرضیایف باشچیلیگیده مهم قدم لرنینگ تشلنگن لیگی نی معلوم قیلدی. 

بیکار سمرقند ده باش قونسلگرلیک آچیلیشی بوییچه بیرگن بیاناتیده, "سیاسی, اقتصادی, فرهنگی, تجاری, بشری و قالیویرسه برچه ساحه لر بوییچه کوچلی قرداشلیک مناسبت لری گه اساسلنگن ستراتیژیک همکارلیک سویه سیده گی ایککی اولکه علاقه لری گه کتته حصه قوشه دی.  ایککی قرداش اولکه اورته سیده دیپلماتیک مناسبت لرنینگ قوریلیشی نینگ 29- ییلی ده سمرقند ده باش قونسلگرلیک آچیله دیگن لیگی بوییچه مژده بیریلیشی بیزلرنی جوده هم خرسند قیلماقده. اوزبیکستان بیلن تورکیه اورته سیده گی دوستلیک و قرداشلیک مناسبت لری نینگ بیر سمبولی دن عبارت بوله دیگن باش قونسلگرلیگی میز نینگ, ایککی تامانلمه مناسبت لری میز و خلق لری میز گه کتته خدمت لر قیله دیگن لیگی گه ایشانچیم کامل " دییه قید ایتدی.