تورکیه تورک کیمه سی نینگ توخته تیلیشی نی قاره له دی

تورکیه, تورک کیمه سی نینگ حقوقی بولمه گن بیر شکلده توخته تیلیب تیکشیریلگن لیگی نی قاره له دی. 

تورکیه جمهوریتی تشقی ایش لر وزیرلیگی سوزچیسی حامی آقسوی, تورک کیمه سی نینگ اورته ییر دینگیزی ده حقوقی بولمه گن بیر شکلده تیکشیریلگن لیگی توغریسیده بیرگن یازمه بیاناتده, صلاحیت سیز بیر شکلده کوچ دن فایده له نیلیب قیلینگن اوشبو تلاشی فعالیتی نی قاره له گن لیک لری نی بیلدیردی. 

آقسوی, "قورال تحریمی نی اخلال قیلمه گن لیگی انیقلنگن کیمه میز نینگ یمان هوا شرایطی ده بیر نیچه ساعت اوشلب توریلگن لیگی, عینی دمده تیکشیرو جریانیده پرسونل بیلن مجرم لر دیک رویه قیلینگن لیگی نی تاسف بیلن کوتیب آلماقده میز.  صلاحیت سیز بیر شکلده کوچ دن فایده له نیلیب قیلینگن اوشبو ایش گه ناراضی چیلیک بیلدیره میز.  اوشبو وضعیت نینگ سبب بوله دیگن ضرر لر گه تضمینات حقی موجود. خلق ارا سوو لرده تجاری کیمه گه مداخله قیلیش اوچون کیمه ده گی بیرققه ایگه دولت دن اجازت آلینیشی کیره ک.  لیبیا قورال تحریمی بیلن علاقه لی بیرلشگن ملت لر تشکیلاتی خوفسیزلیک کینگشی قرار لری اوشبو مسئولیت نی بیکار قیلگن ایمس" دییه قید ایتدی. 

تورکیه نینگ بشری یاردم آلیب باریاتگن کیمه سی استانبول دن لیبیا گه حرکت قیلگن ایدی. 

کیمه, توناوون کیچه یونان دینگیز کوچ لری دن بیر قوماندان نینگ قومانده سیده گی ایرینی عملیاتی دایره سیده وظیفه اجرا قیلیاتگن آلمان اوروش کیمه سی تامانیدن مورا یریم ارالی نینگ جنوبغربی ده خلق ارا سوو لرده حقوقی بولمه گن بیر شکلده توخته تیلدی. 

کیمه نی توخته تگن عسکر لر, تورکیه نینگ اجازت بیرمس لیگی تقدیرده تلاشی قیلیش لری نینگ حقوققه اویغون بولمه یدیگن لیگی توغریسیده گی سوز لرگه قره مسدن کیمه ده گی برچه کانتینر لر نی تیکشیریب چیقدی. 

کیمه هیداوچیسی نینگ انتقال ایتتیریلیاتگن یوک توغریسیده معلومات بیرگن لیگی گه قره مسدن, باشله تیلگن و کیچه نینگ یریمی گه قدر دوام ایتگن تلاشی تورکیه نینگ اعتراض لری بیلن اداققه ییتدی.  قوراللی پرسونل تانگ آتگونچه تجاری کیمه ده کوتیب توردی و شونده ی قیلیب ایرته لب کیمه نی ترک ایتدی.