پکتیکا ولایتیده زلزله عاقبتیده حیاتی نی یوقاتگن لر سانی آرتدی

پکتیکا ولایتیده 22- جون کونی یوز بیرگن زلزله عاقبتیده حیاتی نی یوقاتگن لر سانی 1150 نفر گه ییتدی. 

افغانستان دولت خبر آژانسی, زلزله عاقبتیده حیاتی نی یوقاتگن لر سانی نینگ 1150 نفر گه ییتگن لیگی نی بیلدیررایکن, 1600 دن آرتیق کیشی نینگ ایسه یره لنگن لیگی نی معلوم قیلدی. 

زلزله نینگ 3 مینگ گه یقین اوی گه آغیر ضرر ییتکزگن لیگی بیلدیریلدی.  

پکتیکا والی لیگی بیرگن بیاناتیده, قیدیرو – قوتقرو فعالیت لری نینگ اداققه ییتگن لیگی نی معلوم قیلرایکن, ویران بولگن اوی لرنینگ قالدیق لری نی آلیب تشلش فعالیت لری نینگ باشله گن لیگی نی بیلدیرگن ایدی. 

زلزله دن تاثیرلنگن گیان و برمل تومن لری و قیشلاق لری گه بوگون دستلبکی یاردم لر ییتیشتیریله باشله گن ایدی. 

اوشبو دایره ده بیرلشگن ملت لر تشکیلاتی گه باغلیق خلق ارا موسسه لر نینگ اینگ کوپ ضرورت بولگن غذا, کمپل و طبی مواد دن عبارت یاردم لری حادثه محلی گه ییتکزیب بیریلدی.

تورکیه جمهوریتی قیزیل یریم آی جمعیتی 500 عایله گه غذایی مواد یاردم ایترایکن, انسان حق و حریت لری یاردم موسسه سی هم 500 کیشی گه پیشیریلگن طعام ترقه تدی. 

طالبان رهبریتی نینگ ساغلیق نی سقلش, مهاجرلر و عودت و ایچکی ایش لر وزیرلیک لری سرپرست لری بیلن باشقه مسئول لری حادثه محلی گه باریب اوشبو یاردم لرنینگ آرتیریله دیگن لیگی نی بیلدیردی.

خلق ارا موسسه لر نینگ همکارلیگی بیلن طالبان رهبریتی نینگ ساغلیق نی سقلش وزیرلیگی, زلزله نینگ یوز بیرگن منطقه ده ساغلیق کنترولی فعالیت لری نی باشلتدی.

عینی دمده افغانستان نینگ ایچیده هم زلزله دن تاثیرلنگن کیشی لر اوچون یاردم کمپاینی باشله تیلدی.