بیرلشگن ملتلر تشکیلاتی مدنیت‌لر اتفاقی ییغینی بولیب اوتدی

بیرلشگن ملتلر تشکیلاتی مدنیت‌لر اتفاقی نینگ 10-گلوبال ییغینیده قبول قیلینگن کسکایس اعلامیه‌سیده هر قنده‌ی کمسیتیشلرگه قرشی کوره‌شیش قطعیتی تأکیدلندی.

تورکيه تشقی ایشلر وزیرلیگی تامانیدن 25-27-نوامبر کونلری پورتگال نینگ کسکایس شهریده اوتکزیلگن بیرلشگن ملتلر تشکیلاتی مدنیت‌لر اتفاقی نینگ 10-گلوبال ییغینی حقیده یازمه بیانات بیریلدی.

بیاناتده 2005-ییلدن بېری تورکيه مېزبانلیک قیله‌یاتگن بیرلشگن ملتلر تشکیلاتی مدنیت‌لر اتفاقی نینگ 10-گلوبال ییغینیگه 25-27 نوامبر کونلری پورتگال نینگ مېزبانلیک قیلگن لیگی بیلدیریلدی.

تورکيه‌دن تشقی ایشلر وزیری خاقان فیدان اشتراک اېتگن ییغینده کسکایس اعلامیه‌سی قبول قیلیندی.

«اعلامیه‌ده تورلی مدنیتلر اورته‌سیده‌گی دیالوگ و اوزارا همکارلیک نینگ تینچلیک و همجهتلیکده یشش‌گه قوشگن حصه‌سی علیحده‌ تاکیدلندی. بوندن تشقری، عرقچیلیک، عرقي کمسیتیش، خارجی دشمنلیگی، دیني صمیمیت‌سیزلیک و باشقه‌ هر قنده‌ی کمسیتیشلرگه قرشی کوره‌شنی دوام اېتتیریش قطعيلیگی تیلگه آلیندی»،- دېییلگن.

اعلامیه‌ده زورآورلیککه آلیب کېله‌دیگن کمسیتیشلرنی هېچ قنده‌ی دین، ملت، مدنیت یاکه اتنیک گروه بیلن باغلش قبول قیلینیشی ممکن اېمسلیگی هم تأکیدلنگن.

بیاناتده، «تورکيه گلوبال مقیاسده اسلامگه نسبتاً سلبي کوز-قره‌ش و باشقه‌ هر قنده‌ی کمسیتیشلرگه قرشی کوره‌شنی دوام اېتتیره‌دی و مدنیت‌لر اتفاقینی قوللب-قوّتله‌یدی»، دېگن افاده‌لرگه ا‌ورین بېریلدی.