اسپانیا باش وزیری فلسطین بیلن جلسه اوتکزیشدن خبر بیردی
باش وزیر می آییده رسمي روشده تن آلگن فلسطین دولتی بیلن ییل نینگ آخریگچه اوزارا جلسه اوتکزه جکلرینی بیلدیردی
اسپانیا باش وزیری پیدرو سنچیز، می آییده رسمي روشده تن آلگن فلسطین دولتی بیلن ییل نینگ آخریگچه بیرینچی ایکّی تامانلمه جلسه نینگ اوتکزیشیدن خبر بیردی.
سنچیز، یازگی تعطیلیدن کیین کیلگوسی سیاسي دورده حکومتی نینگ اوستوار یونهلیشلری حقیده مادریددهگی کیرونتیس انستیتوتیده سوزگه چیقدی.
اسپانیا باش وزیری، «بیرلشگن ملتلر تشکیلاتی نینگ یقین شرقدهگی فلسطین قاچقینلریگه یاردم و قَیته قوریش باشقرمه سینی (UNRWA) قوللب-قوّتلش، خلقارا جزا محکمه سی آرقهلی (اسرائیل باش وزیری بنیامین) نتانیاهو اوستیدن باسیم اوتکزیشنی دوام ایتتیریش و فلسطین دولتی بیلن علاقهلرنی مستحکملب، غزه اهالیسینی قوللب-قوّتلشده دوام ایتهمیز»، دیدی.
اسپانیا نینگ 28 می کونی فلسطین دولتینی رسمي روشده تن آلگنینی ایسلهتیب اوتگن سنچیز، «بو ییردن اعلان قیلماقچیمنکی، ییل آخریگچه اسپانیا و فلسطین دولتلری اورتهسیده بیرینچی ایکّی تامانلمه جلسه نی اوتکزهمیز. بو جلسه ده اسپانیا و فلسطین دولتلری اورتهسیده تورلی کیلیشوولر امضالنیشینی کوتهمیز»، دیدی.
اسرائیل تشقی ایشلر وزیری اسرائیل کاتز 2-سپتامبر کونی اجتماعي ترماقلریده بیرگن بیاناتیده اسپانیا باش وزیری سنچیزگه چقیریق قیلیب، «فلسطین نی تن آلیش قرارینی قَیتریب آلیشنی» سورهگن ایدی.
اسپانیا باش وزیری سنچیز، فلسطین دولتی بیلن ایکّی تامانلمه جلسه اوتکزیلیشینی اعلان قیلیب، اسرائیل تشقی ایشلر وزیریگه هم جواب بیرگن بولدی.
