غرب ده کرونا ویروس یوزلب کیشی نینگ اولیمی گه سبب بولدی

ایتالیا ده کرونا ویروس سببلی حیاتی نی یوقاتگن کیشی لرنینگ سانی نینگ 463 نفر گه کوتریلیب کیتگن لیگی بیلدیریلدی. 

اوشبو اولکه ده تداوی آستیده گی کیشی لرنینگ سانی تقریباً 8 مینگ دن عبارت ایکن,  800 کیشی ایسه توزه لگن. 

ایتالیا باش وزیری جوزپه کونته, اولکه ده کرونا ویروس گه قرشی تدبیر لر نی اینگ یوقاری پاغانه گه چیقارگن لیک لری نی بیلدیردی. 

اسپانیا ده کرونا ویروس واقعه سی نینگ اینگ کوپ بولگن مادرید ده بیر کون نینگ اوزی ده گینه اولیم و واقعه سانی ایککی قَوَت گه کوتریلیب کیتدی. 

اولگن کیشی لرنینگ سانی 8 کیشی دن 16 نفر گه کوتریلیب کیترایکن, واقعه سانی ایسه 202 دن 469 گه کوتریلیب کیتگن. 

اولکه ده کرونا ویروس انیقلنگن کیشی لرنینگ سانی بیر مینگ نفر دن آشرایکن, باش وزیر پدرو سانچز, یقین کیله جکده "عاجل مداخله پلانی" نی تطبیق ایته دیگن لیک لری نی معلوم قیلدی. 

فرانسه ده کرونا ویروس سببلی 25 کیشی هلاک بولدی.  عینی دمده فرانسه فرهنگ وزیری فرانک ریستر ده هم کرونا ویروس کورینگن لیگی بیلدیریلدی. 

آلمان ده ایسه نوردراین وستفالن ایالتیده, ایککی کیشی نینگ کرونا ویروس سببلی اولگن لیگی معلوم قیلیندی. 

اوشبو اولکه ده واقعه سانی ایسه بیر مینگ دن هم آرتیق. 

انگلستان ده اوشبو ویروس سببلی اولگن کیشی لرنینگ سانی 5 گه و واقعه سانی 319 گه کوتریلیب کیتدی. 

سویس ده واقعه سانی 369 ایکن, 2 کیشی اوشبو کسللیک سببلی اولدی. 

کرونا ویروس واقعه سی سانی هالند ده 321, سویدن ده 252, بلجیم ده 239, اطریش ده 131, یونان ده 84, دنمارک ده 59, پرتگال ده 32, چکیا ده 32 و پولند ده 16 گه کوتریلیب کیتدی.

اوروپا مرکز بانکی ده هم بیر کیشی ده کرونا ویروس تستی نینگ مثبت چیققن لیگی بیلدیریلدی. 

اوروپا بیرلیگی پارلمانی باشلیغی دیوید ساسولی نینگ ویروس سببلی, بلجیم پایتختی بروکسل ده اوییده قرنطین آستی گه آلینگن لیگی معلوم قیلیندی. 

امریکا قوشمه ایالتلری ده 34 ایالتده 26 کیشی ویروس سببلی حیاتی نی یوقاترایکن, واقعه سانی 700 دن آشدی. 

واقعه سانی 77 گه کوتریلیب کیتگن کانادا ده ایسه کرونا ویروس سببلی بیر کیشی حیاتی نی یوقاتدی. 

جنوبی قبرس روم رهبریتی ده هم بیرینچی مرته کرونا ویروس واقعه سی انیقلندی. 

شونده ی قیلیب بیریلگن خبر لر گه کوره, بیری ایتالیا دن و باشقه سی ایسه انگلستان دن کیلگن ایککی کیشی ده کرونا ویروس انیقلنگن. 

شمالی قبرس تورک جمهوریتی ایسه بیرینچی کرونا ویروس واقعه سی آلمان لیک بیر توریست ده انیقلندی.