سفرنامه 5
برنامه

مېنینگ اسمیم سَیران. مېن تورکيه نینگ جنت بورچکلرینی کشف اېتیش اوچون باشلهگن سیاحتیم نینگ بیرینچی بېکتی استانبول. مېن بو سِحرلی شهر نینگ قلبیدهگی گوزللیکلرنی کشف اېتیشده دوام اېتماقدهمن. سیزلر بیلن باهملیشیش اوچون کوپ حکایهلریم بار...
استانبول نینگ قلبیده، استقلال جادهسی نینگ باشیده توردیم. جاده بویلب چوزیلگن تیمیر یول اوستیده سېکین حرکتلنهیاتگن تاریخي تراموای نینگ آوازی، شهردهگی وقت نینگ ریتمینی بېلگیلب بېرردی. قونغیراق آوازی بیلن اوزینی بیلدیرردی؛ گویا "مېنی قاچیرمه!" دېگندېک. هیجان بیلن تاریخي تراموایگه چیقیب آلدیم. قیزیل واگون نینگ نوستالجیک محیطی، مېنی بیر دمده اوتمیش استانبولگه آلیب کېتدی. تراموای حرکتلنهیاتگنده، استقلال جادهسی نینگ جانلی محیطی و تاریخي گوزللیکلری بیر فلم کبی آقیب اوتردی. ایچکریدهگی هر بیر کیشی بو قیسقه، اما سِحرلی سیاحت نینگ بیر قِسمی اېدی. بیر بېکتده تراموای نینگ آرقهسیگه تیرکهشیب آلگن بالهلرنینگ قهقههلری و شادلیگی، سیاحتنی ینهده اونوتیلمس قیلدی. سېکین حرکتلنهیاتگنده تاریخي بنالر یانیدن اوتدیم. تراموای بیلن سیاحت، نهفقط ترانسپورت واسطهسی، بلکه استقلال جادهسی نینگ روحینی حس قیلیش اېدی. آخرگی بېکتگه کېلگنیمیزده تراموای نینگ اېشیکلری ینه بیر بار ملایملیک بیلن آچیلدی. خیرلشیش وقتی کېلگن اېدی، لېکن ایچیمده، بو سیاحت روحومده ایز قالدیرگنینی حس قیلدیم. تراموایدن توشهیاتگنیمده ینه مینیش ایستهگی بیلن تولیب تاشگندیم. استانبول نینگ تاریخي تراموایی، استقلال جادهسینی کشف اېتیش نینگ اېنگ نوستالجیک و سِحرلی یولی اېدی. بو قیسقه، اما اونوتیلمس حکایه، خاطرهلریمده دایم یشهیدی.
استقلال جادهسیده یوررکن قدملریمنی قهیېرگه یونهلتیریشنی اویلردیم. بو سِحرلی جاده و اونینگ اطرافیدهگی جادهلرنی کېزیب، موزیملرینی کشف اېتمسلیک بولمسدی. بیرینچی بېکتیم پېرا موزیمی اېدی. کتّه هیجان بیلن ایچکریگه کیردیم. کیریشده مېنی سِحرلی بیر صنعت محیطی کوتیب آلدی. عثمان حمدی بېی نینگ مشهور "تاشبقه تربیهچیسی" تابلوسینی کوریش اوچون صبرسیزلنردیم. تابلونی قرشیمده کورگنیمده، تفصیلاتلرینی اورگنهیاتگنده وقت ایچیده سیاحت قیلهیاتگندېک اېدیم. کېین موزیم نینگ یوقاری قبتلرینی ایلندیم؛ عثمانلی دوریگه عاید اثرلر، زمانهوي صنعت کورگزمهلری... هر بیر بورچک، علیحده بیر حکایهنی سوزلب بېرردی. کېینگی بېکتیم مادام توسو بال موملی هیکللر موزیمی بولدی. ایچکریگه قدم قویگنیمده خودّی مشهورلر بیلن توله بیر صالونگه کیرگندېک حس قیلدیم. آتهتورک نینگ هیکلی آلدیده توختهب حیرت بیلن قرهدیم. کېین بیر بورچکده مېریلین مانرا نینگ ظریفلیگی، باشقه تامانده اېسه مېسسی نینگ قطعیتینی کوزهتدیم. تنیقلی تورک صنعتکارلرینی کورگنیمده اېسه بوتونلهی هیجانگه توشدیم، خودّی حقیقيلریدېک. رسم آلمهسدن توریش ممکن اېمسدی! سلت بېی اوغلی و گلاته مولويخانهسی موزیمی، باشقه توختهگن بېکتلریم اېدی. سلت بېی اوغلیده اوتمیش استانبول نینگ صورهتلری، شهر رېجهلری و زمانهوي صنعت پروژهلری مېنی مفتون اېتدی. اوزیمنی، شهرنینگ هم اوتمیشیگه، هم کېلهجگیگه تېگینهیاتگندېک حس قیلدیم. سیاحتیمنی یکونلش اوچون استقلال نینگ آخریده گلهاته مولويخانهسی موزیمیگه یونهلدیم. بو تینچلیک توله جایده، درویشلر نینگ معنوي سیاحتلریگه گواه بولگن جایلرنی ایلندیم. نَې آوازی بیلن توله خانهده بیر مدت اوتیریب کوزلریمنی یومدیم؛ گویا ایچکی بیر تینچلیک تاپدیم.
استقلال جادهسی و اطرافیدهگی توگهمس جمعیت ایچیده ساعتلب ایلنیب چیقدیم. هر بیر بورچهگی علیحده حکایه دن عبارت بو جاده، بیر تاماندن مېنی مفتون اېتسه، باشقه تاماندن چرچهتردی. قارنیم جوده آچ قالیب کېتگن، بیرار نرسه یېییش اوچون اطرافگه قرردیم. شو پیت بیر بورچکدن اشتها آچووچی هیدلر دماغیمگه اورولدی. کتّه، بوغی چیقیب تورگن کچالولر بیلن توله آشتخته اعتباریمنی تارتدی. نیمه اېکنلیگینی قیزیقیب یقینلشدیم. آشتختهدهگی اوستادن بو قیزیق طعام نینگ نامینی سوردیم. "کومپیر،" دېدی. ایلگری هېچ کومپیر یېمهگن اېدیم، لېکن سینهب کوریش اوچون توغری پیت بولیب تویولردی. چونکه بو یېرگه، تورکيهگه خاص تورلی طعملرنی کشف اېتیش اوچون کېلگن اېدیم. آشتخته آلدیدهگی رنگ-برنگ مسللیقلرنی کوزدن کېچیردیم. کچالونی سریغ یاغ و سریغ پنیر بیلن ارهلشتیردی و ایچیگه جواری، زیتون، ساسیسکه و ینه کوپلب نرسهلرنی قوشدی. قولیمگه آلگنیمده، کومپیرنینگ ایسسیغی و یاقیملی هیدی مېنی اوزیگه تارتردی. بیر اوریندیق تاپیب اوتیردیم و بیرینچی قاشیقنی آلدیم. یومشاق کچالو و اوستیدهگی نرسهلرنینگ اویغونلیگی عیناً لذت بیرهمی اېدی. اوشه لحظهده نهفقط آچلیگیمنی قاندیرگن، بلکه استقلال جادهسیده اونوتیلمس تجربه آرتتیرگن اېدیم. چرچهگن بولسهم هم، بو کومپیر مېنگه قوّت بېرگن، کونیمگه طعم قوشگن اېدی.
کېینگی بولیمده، استانبول کشفیاتیمدن گلاته و بوغاز سیاحتی دوامیده باشدن کېچیرگن یاقیملی خاطرهلریمنی سیزلر بیلن باهم کورهمن. اوشهنده کوریشگونچه خیر!