21- عصرنینگ ایلک 25 ییلی نینگ مهم واقعه لری
برنامه

21- عصرنینگ ایلک 25 ییلی نینگ مهم واقعه لری
2021-ییل 6- جنوری کونی امریکا قوشمه ایالتلری تاریخیده مثلی کوریلمهگن واقعه پایتخت واشنگتنده یوز بیردی. 2017- ییلدهگی سیلاولرده مملکت 45- دولت رئیسی اېتیب سیلنگن دونالد ترامپ، ایکّینچی بار قتنشگن سیلاوده دموکرات حزب نامزادی جو بایدنگه یوتقزگچ، سیلاو نتیجهلرینی "فساد" بارلیگی بهانهسی بیلن تن آلمهدی. ترامپ طرفدارلری نینگ بیر نېچه کون دوام اېتگن نمایشلری مملکت تاریخیده ایلک بار واشینگتندهگی تاریخي کنگره بناسیگه هجوم قیلینیشی و تالان-تاراج قیلینیشی بیلن یکونلندی. نهفقط امریکا قوشمه ایالتلری، بلکه بوتون دنیا دقتینی بو جایگه تارتگن حالده، پولیس و نمایشچیلر اورتهسیدهگی توقنهشوولرنی جانلی روشده تلویزیونلردن و اجتماعي ترماقلردن کوزهتدی. حربي قوشینلر هم جلب قیلینگن توقنهشوولر نتیجهسیده بیری پولیس بولگن 4 کیشی هلاک بولدی، پولیسلر هم بولگن اونلب کیشی یرهلندی و تېرگاو نتیجهسیده 700 دن آرتیق کیشی حبسگه آلیندی. بو واقعه نهفقط امریکا قوشمه ایالتلریده، بلکه بوتون دنیاده دموکراسی نینگ کېلهجگی و اینیقسه سیلاولر بوییچه دموکراتیک و حقوقي حقلر بارهسیده ینگی تارتیشوولرنی کېلتیریب چیقردی.
امریکادهگی کنگره باسقینیدن راپه-راسه 6 ییل آلدین، 2015-ییل 7-جنوریده پاریسده چرلیې هېبدو مجلهسیگه اویوشتیریلگن و 12 کیشی حیاتینی یوقاتگن قوراللی هجوم اېسه "فکر اېرکینلیگی نینگ چېگرهلری" مناظرهسینی هم کېلتیریب چیقردی. مجله، اینیقسه حضرت محمد (ص) و اسلامگه نسبتاً تحقیرلاوچی کریکاتولری بیلن کوپ مراتبه فرانسهده یشاوچی مسلمان جماعهسی نینگ ناراضیلیک نمایشلریگه دوچ کېلگن، اما مسلمانلر مقّدس دېب بیلگن قدریتلرگه بها بیرمهگن حالتیدن واز کېچمهگن اېدی. فرنسه حکومتی "تروریستیک هجوم" دېب تعریفلهگن قوراللی هجومدن سونگ مملکت نینگ تورلی شهرلریده ناراضیلیک نمایشلری اوتکزیلدی. هجومدن 4 کون اوتیب پاریسده، اکثریتی اروپا دولتلری رهبرلریدن عبارت 50 گه یقین دولت و حکومت رهبرلری اشتراکیده "جمهوریت یوریشی" اوتکزیلدی.
2020- ییل 8- جنوریده اېران انقلاب قوریقچیلری، تهران خلقارا هوا قونلغه سیدن کیفگه اوچماقچی بولگن اوکراین هوا یوللریگه تېگیشلی یولاوچی اوچاغینی راکت بیلن اوریب توشیردی. اېران حکومتی دستلب اوچاقنی اوزلری اوریب توشیرگنینی تن آلمهدی، اما کېینچهلیک اوچاق انسان خطاسی نتیجهسیده آتیلگن ایکّی راکت بیلن اوریب توشیریلگنی انیقلندی. 176 کیشی هلاک بولگن بو هجوم نتیجهسیده 10 نفر اېرانلیک حربي خدمتچی قماق جزاسیگه محکوم قیلیندی. اېران شونینگدېک، هلاک بولگنلرنینگ عایلهلریگه تاوان تولشگه راضی بولدی.
فلسطین افسانهوي یېتکچیسی یاسر عرفات وفاتیدن سونگ، " ابومازن " تخلصی بیلن تنیلگن فلسطین آزادلیک تشکیلاتی نینگ ایکّینچی شخصی محمود عباس، 2005- ییل 9- جنوریده اوتکزیلگن سیلاولرده فلسطین دولت رهبری اېتیب سیلندی. اسرائیلگه قرشی قوراللی قرشیلیک اورنیگه سیاسي یېچیم اوچون مذاکرهلرگه اعتبار قرهتیشی بیلن تنیلگن محمود عباس نینگ دولت رهبرلیگی دوریده، او باشچیلیک قیلگن الفتح تشکیلاتی بیلن غزه قیرغاغیده تأثیرگه اېگه بولگن حماس باشقرووی اورتهسیده قوراللی توقنهشوولرگچه بارگن کېلیشماوچیلیکلر یوز بېردی. عباس نینگ لوازمده بولگن 20 ییللیک دوریده نه غربي قیرغاقده، نه غزه قیرغاغیده فلسطین خلقی نینگ کوز یاشلرینی توختهتهدیگن تینچلیککه اېریشیلمهدی.
2016 - ییل 11-جنوریده بغداد و اطرافیدهگی اَیریم اهالی تورر جایلریده ترور تشکیلاتی داعش اعضالری تامانیدن بیر وقت نینگ اوزیده پارتلاوچی هجوملر اویوشتیریلدی. خودکش هجومچی و پارتلاوچی مادّه اورنه تیلگن اتوموبیللر بیلن عملگه آشیریلگن، شیعهلر جماعهسی کوپ بولگن حدودلرنی نشانگه آلگن هجوملر نتیجهسیده 132 کیشی هلاک بولدی، تخمیناً 400 کیشی یرهلندی. صدام حسین حکومتی اغدریلگنیدن کېین مملکتده ترتیب-کنترولنی تأمینلشده قیینهلگن ینگی عراق حکومتی و امریکا کوچلری اېسه هجوملردن سونگ ناراضیلیک نمایشلریگه دوچ کېلدی.
2010-ییل 12-جنوریده هایتیده یوز بیرگن زلزله مینگلب کیشی نینگ هلاک بولیشیگه سبب بولدی. اهالی کوپ بولگن حدودلرنی لرزهگه کېلتیرگن 7 رشتر کوچیدهگی زلزلهدن تخمیناً 3 میلیون کیشی ضرر کوردی. بیر ییل اوتگچ هایتی حکومتی تامانیدن بیریلگن بیاناتده زلزله و اوندن کېین ترقهلگن یوقوملی کسللیکلر طفیلی 316 مینگ کیشی وفات اېتگنی معلوم قیلیندی.