تورکیه نینگ اوزگرگن سوریه سیاستی
برنامه
تورکیه نینگ اوزگرگن سوریه سیاستی
8-دسامبرده اسد رژیمی قولهشی آرتیدن تورکیه نینگ سوريه سیاستیده مهم اوزگریش جریانگه کیردی و ینگی ستراتیژیک قَیته تشکیل اېتیش دوری باشلندی. بو مهم اوزگریشدن آلدین تورکيه نینگ سیاستی تروریزم بیلن کورهشیش، قاچقینلر بحرانینی باشقریش و سوريه نینگ توپراق بوتونلیگینی سهقلشگه قرهتیلگن اېدی. اسد رژیمی بیلن مناسبتلرنی نورمهللشتیریش، پ ک ک نینگ سوريه ترماغی بولگن وای پی جی بیلن کورهشیش، قاچقینلرنینگ قَیتیشینی آسانلشتیریش و بیرلشگن ملتلر تشکیلاتی خوفسیزلیک کېنگشی نینگ 2254-سانلی قراری دایرهسیده سیاسي یېچیم ایزلش انقره نینگ اساسي اوستوار وظیفهلری اېدی. بوندن تشقری، تورکيه آستانه ییغینی دایرهسیده روسيه و اېران بیلن موازنت سیاستینی آلیب بارگن حالده، وای پی جی معماسینی حل قیلیش اوچون امریکا قوشمه ایالتلری بیلن همکارلیک قیلیشگه حرکت قیلدی.
خوفسیزلیک بوییچه تیکشیرووچی و یازووچی پروفیسور دوکتور مراد یشیلتاش نینگ موضوع حقیده گی تحلیل یازووینی تقدیم ایته میز.
اسد رژیمی نینگ قولهشی تورکيهنی سوريه نینگ برچه حدودلرینی برقرارلشتیریش مقصدیده بوتونلیک ستراتیژينی قبول قیلیشگه اوندهدی. بو یاندشوو، آلدینگی ییللرنینگ پرچهلنگن سیاستی اورنینی اېگهللب، انقره نینگ منطقهدهگی برقرارلیکنی تأمینلش مقصدیگه اعتبارینی قرهتگنینی عکس اېتتیرهدی. تورکيه نینگ اساسي مقصدلری آرهسیده مرکزي حاکمیت توزیش، توپراق بوتونلیگینی تأمینلش و یگانه سوريهنی شکللنتیریش موجود. بو مقصدلر خوفسیزلیک، باشقروو و حاکمیت نینگ یگانه باشقروو آستیده بیرلشتیریلیشینی تأکیدلهیدی.
تورکيه، حاضرگی سوريه منظرهسینی منطقوي برقرارلیک اوچون امکانیت صفتیده کورماقده. اسد رژیمی نینگ قولهشی تورکيهگه ماسلشووچن سیاست آلیب باریش امکانیتینی یراتیب، سوريه نینگ سیاسي کېلهجگینی بېواسطه شکللنتیریش اوچون زمین یرهتماقده. تورکيه نینگ مخالف کوچلر بیلن توقنه شوو بولمهگن حدودلرنی حمایه قیلیش، ادلبده محلي باشقروو میکانیزملرینی ایشلهتیش و رادیکال ترور عنصرلری گه قرشی کورهشیش مسألهلریدهگی اوزاق مدتلی موافقلشتیریش ایشلری، اوتیش دوریده مهم تأثیر میدانینی یرهتماقده.
اسددن کېینگی سوريهده اېران نینگ کمهیگن تأثیری هم تورکيه اوچون مهم اوستونلیک حسابلنهدی. اېران اېندی سوريهده نه حربي کوچ، نه دَمشق باشقرووی اوستیدن سیاسي یاکه مفکوروي تأثیرنی سهقلب قاله آلماقده. شونینگدېک، روسيه نینگ اوکرایندهگی اوروشگه اعتبار قرهتیشی، مسکونینگ سوريه اوستیدهگی تأثیرینی ضعیفلشتیریب یوباردی. تورکيه نینگ عرب مملکتلری بیلن مناسبتلریدهگی یخشیلنیش هم اونینگ اورنینی مستحکملهماقده. تورک-عرب اتفاقی نینگ کوچهییشی انقرهگه سوريه نینگ برقرارلیگینی تأمینلشده منطقوي یاردم آلیش امکانینی بېرماقده.
ستراتیژیک اوستونلیکلرگه قرهمهی، تورکيه اسددن کېینگی سوريهده تورلی قیینچیلیکلرگه دوچ کېلماقده. وای پی جی مهم تهدید بولیب قالهیاتگن بیر پیتده، انقره بو معما نینگ یېچیمینی ینگی دَمشق باشقرووی نینگ مسوولیتیده دېب بیلماقده. وای پی جی نینگ دموگرافیک، حربي و منطقوي قوللب-قوّتلش یېتیشمسلیگی، یېچیم اوچون میدان یرهتماقده. بیراق تورکيه منطقوي و خلقارا اشتراکچیلرنینگ وای پی جی مسألهسیدهگی یانداشوولرینی یقیندن کوزهتماقده، اینیقسه ترامپ باشقرووی سیاستی نینگ تأثیرلرینی بهالهماقده.
اسرائیل نینگ جولان تېپهلیکلری اوستیدهگی تجاوزکار سیاستی ینه بیر مهم تهدید حسابلنهدی. اسرائیل سوريهده اېراننی ضعیفلشتیریشنی ستراتیژیک غلبه دېب حسابلهسه-ده، انقره، دَمشق و عرب مملکتلری اسرائیل نینگ باسیب آلگن سوريه حدودلریدن چیقیب کېتیشینی طلب قیلماقده. اسرائیل نینگ تجاوزکار یانداشووی تورکيه و اسرائیل نینگ سوريهده توقنهشیش خوفینی آشیرماقده و ینگی توقنه شوولرگه یول آچماقده.
تورکيه نینگ ینگی سوريه استراتیژيسی تورتته اساس اوستیگه قوریلگن. بیرینچیسی، خوفسیزلیک و برقرارلیکنی تأمینلش اوچون مرکزي حاکمیتنی توزیشدیر. تورکيه ینگی دَمشق باشقرووی بیلن کېنگ قمراولی حکومت توزیش، آزچیلیک حقلرینی حمایه قیلیش، قاچقینلرنینگ قَیتیشینی آسانلشتیریش و ترور عنصرلری بیلن کورهشیش بوییچه یقین همکارلیک قیلماقده.
ایکّینچی اساس، بیرلشگن سوريهنی قوریشدیر. تورکيه چېگرهلری یگانه حاکمیت تامانیدن قوریقلنهدیگن، مرکزي حکومتگه اساسلنگن دموکراتیک تیزیم یگانه یېچیم اېکنلیگیگه ایشانهدی. اوچینچی اساس اېسه منطقوي دیپلوماسی نینگ ثمرهلی قوللنیلیشیدیر. تورکيه سوريه نینگ سیاسي و اقتصادي قَیته قوریلیشی اوچون عرب مملکتلری بیلن ایکّی تامانلمه و کوپ تامانلمه دایرهلرده همکارلیک قیلماقده. تورتینچی اساس اېسه، خلقارا همجمعيت نینگ سوريه نینگ اوتیش دوریگه یاردم بېریشی اوچون کوپ تامانلمه دیپلوماسينی فعاللشتیریش.
تورکيه نینگ اسددن کېینگی سوريهده تبلیغ یاندشووی، منطقوي برقرارلیکنی تأمینلش و قرمه قرشی جیوپولیتیک دینامیکنی باشقریش مقصدینی عکس اېتتیرهدی. ستراتیژیک فرصتلردن فایدهلنگن حالده، وای پی جی و اسرائیل کبی تهدیدلرگه قرشی کورهشهیاتگن تورکيه، ثمرهلی دیپلوماسی آرقهلی سوريه نینگ کېلهجگینی شکللنتیریشده اساسي اشتراکچی صفتیده اوز اورنینی اېگلّهماقده. بو ینگی یول تورکيه نینگ منطقهدهگی یېتکچیلیک رولینی و برقرارلشتیرووچی عنوانینی مستحکملهماقده.
خوفسیزلیک بوییچه تیکشیرووچی و یازووچی پروفیسور دوکتور مراد یشیلتاش نینگ موضوع حقیده گی تحلیل یازووینی تقدیم ایتدیک.
