تورکيه انرژیده اوز مقصدلریگه اېریشماقده
برنامه
تورکيه انرژیده اوز مقصدلریگه اېریشماقده
2024 ییل توگهشیگه هم منه سناقلی کونلر قالدی. تورکيه بو ییل انرژی ساحهسیده اوز آلدیگه جوده کتّه مقصدلرنی قویگن اېدی. بو مقصدلرنینگ اکثریتیگه ییل آخریگه قدَر اېریشیلدی. جمهوریت تاریخیده قَیته تیکلنووچی انرژی منبعلری، طبيعي گاز و نفت قازیب آلیش بوییچه رېکوردلر اورنه تیلدی.
تورکيه محلي و خلقارا نفت ایشلب چیقریشده کونیگه 150 مینگ بشکهدن آشدی. شوندهی قیلیب، کونیگه 1 میلیون بشکه اطرافیده نفتگه بولگن احتیاج نینگ 15 فایزی ملي منبعلردن قاندیریله باشلندی.
شیرناق ولایتی نینگ گبار منطقهسیده کونلیک نفت ایشلب چیقریش 57 مینگ بشکهدن آشدی. منطقهده ینگی نفت قیدیروو ایشلری دوام اېتماقده. جاري ییل نینگ آخریگه قدَر، اینیقسه، شیرناق، حقاری و وان ولایتلریده توپلم 103 منطقهده بورغولش ایشلرینی جدللیک بیلن عملگه آشیریش رېجهلشتیریلگن. شونینگدېک، بو حدودده 66 میلیون بشکه ینگی ذخیرهلر انیقلنگنی ایتیلماقده.
2025 ییلی اوچون انرژی و طبيعي منبعلر وزیرلیگی نینگ یول خریطهسی بېلگیلنگن وضعیتده. کېلگوسی ییلده 143 ته جایده قیدیروو بورغولش ایشلری آلیب باریلیشی کوزده توتیلگن. بو نینگ اوچون 140 میلیارد لیرهدن آرتیق سرمایه کیریتیلیشی رېجهلشتیریلگن.
قارهدېنگیزدهگی طبيعي گاز بورغولش ایشلری هم کوتیلگنیدن موفقیتلی بولدی. تورتته دېنگیز بورغولش کېمهسی، ایکّیته سېیسمیک قیدیروو و قوللب-قوّتلش کېمهسیدن عبارت زمانهوي فلوتگه اېگه بولگن تورکيه، ایشلب چیقریشنی ایکّی برابرگه آشیردی.
سکاریا کانیده 2023 ییلده کونیگه 3،8 میلیون متر مکعب بولگن طبيعي گاز ایشلب چیقریش حجمی، جاري ییل نینگ 11 آیلیک معلوماتلریگه کوره، 7 میلیون مترگه یېتدی.
عمومي طبيعي گاز قازیب آلیش هم کونیگه 8 میلیون مترگچه آشدی. شوندهی قیلیب، 3،5 میلیون عایله نینگ احتیاجلری ملي منبعلر حسابیدن قاندیریله باشلندی.
شوندهی قیلیب جاري درآمد کمچیلیگینی یاپیشگه کتّه حصه قوشیلدی. تورکيه 2022 ییلده طبيعي گاز اوچون 44،6 میلیارد دالر توولندی. 2023 ییلده بو کورستگیچ 23،5 میلیارد دالرگچه کمهیدی. 2024 ییلده بو مقدار ینهده کمهییشی کوتیلماقده.
تورکيه 2025 ییل اوچون انرژی مقصدلریده سېزیلرلی اوسیشنی کوتماقده. کېلگوسیده الکتریک انرژیسی ایشلب چیقریشده قَیته تیکلنووچی انرژی منبعلری نینگ اولوشینی 47،8 فایزگه یېتکزیش رېجهلشتیریلگن. قویاش، شمال، جیو ترمال و هیدرو الکتریک استیشنلری نینگ ایشلب چیقریشدهگی اولوشینی آشیریش بو مقصد نینگ اېنگ مهم عنصرلرینی تشکیل ایتهدی.
کېلگوسی ییلده تورکيه نینگ قویاش الکتریک استیشنلریدهگی اورنهتیلگن قوّتینی 22 مینگ 600 مېگاواتگه، شمال الکتریک استیشنلرینی 14 مینگ 800 میگاواتگه، هیدرو الکتریک استیشنلرنی 32 مینگ 395 مېگاواتگه، جیوترمال انرژی استیشنلرنی اېسه 4 مینگ 487 مېگاواتگه آشیریش مقصد قیلینگن.
شو دایره ده، قَیته تیکلنهدیگن منبعلردن آلینهدیگن عمومي قوّت 74 جیگوات دن آشهدی.
تورکيه الکتریک اوزهتیش شرکتی معلوماتلریگه کوره، تورکيه حاضرده 32 مینگ 195 مېگاوات هیدروالېکتریک، 12 مینگ 369 مېگاوات شمال انرژیسی، 18 مینگ 756 مېگاوات قویاش انرژیسی و 1691 مېگاوات جیوترمال قوّتگه اېگه.
قَیته تیکلنهدیگن انرژی منبعلریگه سرمایه کیریتیشلر آشیب باریشی بیلن بیرگه، طبيعي گاز نینگ الکتریک انرژیسی ایشلب چیقریشدهگی اولوشی استه-سېکین کمهیهدی.
2023 ییلده 21،4 فایز بولگن طبيعي گازنینگ الکتریک انرژیسی ایشلب چیقریشدهگی اولوشینی 2025 ییلده 18،9 فایزگه کمهیتیریش کوزده توتیلگن.
بوندن تشقری، خارجي انرژیگه قرهملیکنی کمهیتیریش مقصدیده الکتریک انرژیسی ایشلب چیقریشده ایچکی منبعلر اولوشینی جاري ییل آخریگه قدَر 58،9 فایزگه، 2025 ییلگچه اېسه 59،4 فایزگه یېتکزیش کوزده توتیلگن.
دنیادهگی علاقهلر هم قَیته تیکلنهدیگن انرژی گه قره تیلگن وضعیتده. گلوبال انرژی سکتوری 2025-ییلده جدّي اوزگریشلرگه تیارلنماقده.
2024 ییلده تازه انرژی علاقهلریده سېزیلرلی اوسیش کوزهتیلماقده. قویاش انرژیسی نینگ اورنهتیلگن قوّتی بوییچه رېکوردلرنی ینگیلش آرقهلی الکتریک انرژیسی ایشلب چیقریشنی کوپهیتیریش کاربن چیقیندیلری نینگ کمهییشیگه کتّه حصه قوشدی.
شونگه قرهمهی، قازیب آلینهدیگن یاقیلغیده ایشلهیدیگن الکتریک استیشنلری انرژی ایشلب چیقریشده مهم رول اویناشگه دوام اېتدی. الکتریک انرژیسیگه بولگن طلب، اینیقسه، گلوبال اقتصادي بحران تأثیری نینگ پسهییشی بیلن چین، امریکا قوشمه ایالتلری و هندوستانده کېسکین آشدی.
جهان طبيعي گاز بازارلریده نرخلر تورلیچه. خلقارا انرژی آژانسی معلوماتلریگه کوره، 2025 ییلده گلوبال الکتریک انرژیسیگه طلب تخمیناً 4 فایزگه آشیشی کوتیلماقده. بونینگ اون ییللر دوامیده کوزهتیلگن قوّتنی آشیریشگه بولگن اېنگ یوقاری طلب بولیشی کوتیله دی. شو سببلی، قَیته تیکلنهدیگن انرژیگه بولگن طلب کېسکین آرتیشی ممکن.
قویاش، شمال و بطریلرنی سقلش 2025 ییلده اوسیشده دوام اېتیشی کوتیلماقده. جهان اقتصادي ییغینی معلوماتلریگه کوره، قویاش انرژیسی 2025 ییلده گلوبال الکتریک انرژیسیگه بولگن طلب نینگ اوسیش سرعتلری نینگ یرمینی قاندیریشی کوتیلماقده. 2025 ییلده قَیته تیکلنهدیگن انرژی ایشلب چیقریش بیرینچی مرته کومیردن آشیب کېتیشی تخمین قیلینماقده.
خلقارا انرژی آژانسی معلوماتلریگه کوره، الکتریک انرژیسی ایشلب چیقریشدن کاربندوکسید چیقیندیلری 2025 ییلده تینگ قالیشی ممکن.
اگر هیدرو الکتریک ایشلب چیقریش کوتیلگنیدن یوقاری بولسه، چیقیندیلر مقداری کمهییشی ممکنلیگی تأکیدلنگن. بیراق، طلب آرتیب بارهیاتگنلیگی سببلی، 2025 ییلده الکتریک انرژیسی نرخی کېسکین آشیشی احتمالی بار.
