قاتلنه‌دیگن تخت حقیده بیر یازوو
برنامه
قاتلنه‌دیگن تخت حقیده بیر یازوو
اویقوسیزلیک زمانه‌وي دورلرنینگ اېنگ مهم معمالریدن بیریدیر. اینیقسه، کتّه شهر اهالیسی کونده‌لیک معمالر بیلن کوره‌شه‌یاتگنده کون دوامیده یوقاتگن انرژیسینی قَیته تیکلش و ینگی کونگه تېتیک حالده کیریشینی مقصد قیله‌دی. بیراق کوپینچه بو ایستکلر تورلی سببلر بیلن عملگه آشمه‌یدی. شونده‌ی اېکن، اورته‌چه انسان بوتون حیاتی دوامیده 26 ییلینی اویقوده اوتکزه‌دی، اما فقط اوخله‌ماقچی بولگن وقتی نینگ 7 ییلی بېکار کېتگنی حسابلنگن. متخصصلر، اینیقسه، تخت تنلش اویقو ترتیبیده جوده مهم اهمیتگه اېگه اېکنلیگینی تأکیدلب، قوله‌ی و کېنگ تختده یاتیش کتّه عایله‌لر و کیچیک اویلرده جدّي معما اېکنینی ایتیشه‌دی. اوشبو معما بوگونگی کونده هوا تختلری، قاتلنه‌دیگن یاکه دېوارگه اورنه‌تیله‌دیگن «یوقاله‌دیگن» تختلر بیلن حل قیلینماقده. خوش، اوی حیاتینی سېزیلرلی درجه‌ده یېنگیللشتیره‌دیگن قاتلنه‌دیگن یاکه یوقاله‌دیگن تختلر قنده‌ی اختراع قیلینگن؟
1885-ییلگه کېلیب، امریکا قوشمه ایالتلری نینگ نیو-یورک شهری، اینیقسه، اروپادن کېلگن و ینگی حیات ایزله‌یاتگن مهاجرلرنینگ آقیمی آستیده اېدی. اوشبو مهاجرلر آقیمی شهرده تورر جای معماسینی جدّي معماگه ایلنتیردی. اېنگ بیرینچی یېچیم کوپ قبتلی بنالر قوریش بولدی. شونده‌ی هم بولدی، اما نیو-یورک بلدیه سی قانوني ترتیبنی جاري قیلیب، کوپ قبتلی بنالرگه چېکلاو قویگنیدن سونگ، دوام اېته‌یاتگن مهاجرلر آقیمی تورر جایلرنی ینه‌ده چېگره‌له‌دی. اېندی آدملر عمومي حاجتخانه(تشناب)گه اېگه بولگن بیر اتاقلی بلاکلرده یششگه مجبور بولدیلر و بو اویلرده هر بیر متر جوده مهم اېدی. اینیقسه، شهر مرکزیده یشه یدیگن یالغیزلر اوز دوستلرینی اوییگه تکلیف قیله آلمه‌سلیکدن شکایت قیلیشدی، چونکه اوشه پیتده اېرکک بوله‌دیمی، عیال بوله‌دیمی، مهمان نینگ اوی اېگه‌سی نینگ تختی تورگن اتاققه کیریشی آدابگه خلاف اېدی.
شهر اېنگ یخشی نجّارلریدن بیری حسابلنگن سره گود مشتریلری نینگ عیناً شو شکایتلری اساسیده ایش باشله‌دی. اوّلیگه تخت نینگ یاغاچ چوکاتینی کیچره‌یتیریشگه حرکت قیلدی، اما کیچیک تخت غایه‌سی مشتریلرگه عموماً یاقمه‌دی، چونکه طلب قیلینه‌یاتگن نرسه تخت نینگ کورینمسلیگی اېدی. میکانیزمنی یره‌تیشده قیینه‌له‌یاتگن سره گود اختراعی گه الهامنی موبل چیزمه‌لرینی یره‌تگن قاتلنه‌دیگن ایش میزیدن آلدی. اخیر، میز قاتلنه‌یاتگن بولسه، تخت هم بوکلنیشی ممکن اېدی. ایشینی شو یونه‌لیشده دوام اېتتیرگن گود نهایت اوز مقصدیگه اېریشدی.
سره گود بیرینچی قاتلنه‌دیگن تخت اختراعی اوچون 1885-ییل 14-جولایده رخصتنامه آلدی، اما اوشه پیتدن بوگونگی کونگچه حیاتیمیزنی آسانلشتیره‌دیگن اوشبو تصادفي اختراعگه اوز نامینی بېره آلمه‌دی، چونکه ییللر اوتیب و نیو-یورکدن مینگلب کیلومتر اوزاقده جایلشگن سن-فرا‌نسیسکو شهریده یشاوچی اوپیرا قوشیقچیسی ویلیا‌م لارېنس میورفی شونگه اوخشش منطقده بیرآز باشقه‌چه اختراع یره‌تدی. میورفی اوپیرا تماشا‌لری آلدیدن بیر اتاقلی اوییده عیال صنعتکار دوستلری بیلن مشق قیلیشنی خواهلردی، اما دور نینگ اخلاق قاعده‌لری بونگه رخصت بېرمسدی. چونکه میورفی نینگ اویی بیر وقت نینگ اوزیده یاتاقخانه اېدی. بو مسأله‌نی حل قیلیش حقیده باش قاتیرگن میورفی، یاتاقخانه‌نی مهمانخانه‌گه ایلنتیریش اوچون دېوار ایچیگه تولیق قاتلنه‌دیگن و بوتونله‌ی غایب بوله‌دیگن تخت تیزیمینی ایشلب چیقدی و اوز اختراعسیگه درحال رخصتنامه آلدی. اوشبو رخصتنامه حقوقی میورفيگه اوپیرا ساحه‌سیده اېریشه آلمه‌گن بایلیکنی موبل ایشلب چیقریش آرقه‌لی تاپیش امکانیتینی بېردی.
چېکلنگن میدانگه اېگه اویلر اوچون کتّه قوله‌یلیک یره‌ته‌دیگن اوشبو تخت مودللری امریکا قوشمه ایالتلری نینگ کتّه شهرلری بویلب «میورفی تختی» نامی بیلن تېز ترقه‌لدی. حتا بو اتَمه تورلی کمپنیلر تامانیدن شو قدَر کېنگ قوللنیله‌دیکی، 1989-ییلده سودا بېلگیسی نینگ حمایه‌سی آلیب تشلندی. بوگونگی کونده اویلر کېنگه‌ییب بارگن سری اویلرده یشاوچی عایله اعضالری سانی کمه‌ییشی بیلن دېوارگه اورنه‌تیله‌دیگن تختلرگه بولگن احتیاج کمه‌یگن بولیشی ممکن، اما بو تصادفي اختراع دېیرلی بیر عصر دوامیده موبل صنایعیده اوز ایزینی قالدیرگنینی اونوتمنگ.
