мәсҗиди әқсада 200 миң киши җүмә намизи оқуди
пәләстин хәлқи ишғалийәтчи исраилийәниң шунчә нурғун тосалғу вә чәклимилиригә писәнт қилмастин, рамизанниң ейиниң 2 – җүмә намизини оқуш үчүн мәсҗиди әқсаға қарап ақти.
түркийә авази радийоси хәвири: он миңлиған пәләстинликләр әтигән сәһәрдин башлапла ишғалийәт астидики ғәрбий қирғақ вә қуддус оттурисидики һәрбий тәкшүрүш понкитлиридин өтүп мәсҗиди әқса тәрәпкә йол алди.
исраилийә сақчилири ишғалийәт астидики шәрқий қуддусниң сабиқ шәһәр райони әтрапидики йолларни тақивелип, аптобустин башқа һечқандақ аптомобилниң өтүишигә рухсәт қилмиди.
шундақтиму пәләстинликләр саәтләргичә пийадә йол йүрүп мәсҗиди әқсаға йетип кәлди вә рамизан ейиниң 2 – җүмә намизи үчүн мәсҗиди әқсаниң һойлисини лиқ толдурди.
қуддус вәқиплири идарисидин елан қилинған йазма байанатта, тәхминән 200 миң пәләстин пуқрасиниң мәсҗиди әқсада җүмә намизи оқуғанлиқи билдүрүлди.
исраилийә һөкүмити (нумус қиларлиқ) айриш теми тосақлири арқилиқ ғәрбий қирғақтин 40 йаштин төвән пәләстинликләрниң қуддусқа киришини чәкләп кәлмәктә. қоршав астидики тәхминән 2 милйон нупусқа игә ғәззәлик пәләстинликләрниң болса, қуддусқа киришигә қәтий рухсәт бәрмәй кәлмәктә.
исраилийә әскәрлири тәкшүрүш понкитлиридин арқиға йандуривәткән он миңлиған пәләстинлик әрләр рамизан ейида ғәрбий қирғақниң сиртиға чиқалмиған болди.
исраилийә рухсәт қилған пәләстин пуқралири болса, таң етиши билән тәңла қуддусқа өтүш үчүн исраилийә һәрбий тәкшүрүш понкитлириниң алдида узун өчирәт шәкилләндүрүп болған иди.
