б д т: мусулманлар нишан қилиниватқан зораванлиқ вәқәлиридин қаттиқ әндишә қиливатимиз

бирләшкән дөләтләр тәшкилати сириланкида мусулманлар нишан қилиниватқан зораванлиқ вәқәлиридин қаттиқ әндишә қиливатқанлиқини билдүрди.

б д т: мусулманлар нишан қилиниватқан зораванлиқ вәқәлиридин қаттиқ әндишә қиливатимиз

түркийә авази радийоси хәвири: бирләшкән дөләтләр тәшкилати баш катипиниң байанатчиси степһан дуҗаррич күндилик мухбирларни хәвәрләндүрүш йиғинида, сириланкида давамлишиватқан аммиви зораванлиқ вәқәлириниң «толиму әндишилик әһвал» икәнликини ейтти.

сириланкида һөкүмәтниң сүркилишни азайтиш вә мурәссәчиликни қолға кәлтүрүш мәсилисидә көрситиватқан тиришчанлиқидин интайин хурсән икәнликлирини әскәрткән дуҗаррич, сириланка хәлқини ихтилапларни дийалог арқилиқ һәл қилишқа чақирди.

у йәнә, бирләшкән дөләтләр тәшкилати баш катипиниң сийасий ишларға мәсул йардәмчиси җефрей фелтманниң җүмә күни сириланкида үч күнлүк зийарәттә болидиғанлиқини, бу зийарәтниң дөләттә җиддий һаләт елан қилиништин илгири пиланланғанлиқиниму сөзлиригә илавә қилди.

сириланкида мусулманлар нишан қилиниватқан зораванлиқ вәқәлиридин кейин канди районида җиддий һаләт елан қилинған иди.

җамаәт хәвпсизлики идариси байанатчиси руван гунасекара синһалалиқ бир әр кишиниң бир гуруппа мусулман тәрипидин һуҗумға учриғандин кейин дохтурханида өлүп кәткәнлики тоғрулуқ хәвәр тарқалғанлиқини, шуниң билән, кабди районида бәзи зораван гуруппиларниң мусулманларға аит өйләр вә иш орунлириға от қойуп бәргәнликини җакарлиған иди.

сириланка пирезиденти матрипала сирисена җиддий һаләт елан қилинған канди районидики вәқәләрниң башқа җайларға йамрап кетишидин әнсирәп җиддий һаләт елан қилиш тоғрулуқ қарар чиқарған иди.

мәркизи сириланкидики кишилик һоқуқ вә тәтқиқат мәркизиниң мәсули кеетри теннаконму зораванлиқ вәқәлиридә мусулманларға аит 11 дукан вә өйгә от қойуп берилгәнликини уқтурған иди.

игилинишичә, сириланка нопусиниң тәхминән % 75 тини буддист синһалалар, % 9 тини болса мусулманлар тәшкил қилидикән.

түркийәму сириланкида һөкүмәтниң дөләттики тили вә дини җәһәттин бир - биригә охшимайдиған етник гуруппиларниң давамлиқ тинч һәм инақ йашиши үчүн муһим тәдбирләрни алидиғанлиқиға ишинидиғанлиқини билдүргән иди.



مۇناسىۋەتلىك خەۋەرلەر