allahning beyti kebining binakarliri

türkiye awazi radiyosi: ibrahim eleyhissalam allahqa yélinip dua qilip bolghandin kéyin, oghli ismail bilen birlikte kebining uligha tash qoyushqa bashlidi. ular tunji tashni qoyghanda: «perwerdigarimiz! bizning (xizmitimizni) qobul qilghin, sen heqiqeten (duayimizni) anglap turghuchisen, (niyitimizni) bilip turghuchisen. perwerdigarimiz! ikkimizni özengge itaetmen qilghin, bizning ewladlirimizdinmu özengge itaetmen ümmet chiqarghin, bizge hejimizning qaidilirini bildürgin, tewbimizni qobul qilghin, chünki sen tewbini nahayiti qobul qilghuchisen, nahayiti méhribansen. perwerdigarimiz! ularning ichidin ayetliringni ulargha tilawet qilip béridighan, kitabingni (quranni), hékmetni (pak sünnetni) ulargha ögitidighan, ularni (mushriklik we gunahlardin) pak qilidighan bir peyghember ewetkin, heqiqeten sen ghalibsen, hékmet bilen ish qilghuchisen»  déyish arqiliq, neslidin insanlarni toghra yolgha bashlaydighan pemghember ewetishi üchün dua qilishti.

allah taala ularning duasini aridin qanche esir ötkendin kéyin meqbul qilip, muhemmed sellelalhu eleyhi wesellemni peyghember qilip ewetti.

kebe sélinip bolghandin kéyin, allah taala ibrahim eleyhissalamni kebini ibadet qilishqa kélidighanlar üchün pakiz tutushni we bu ibadetke «hej» déyilishni buyrudi.

janabiy allah bu heqte quran kerimde mundaq deydu: «kishilerning arisida (ularni) hejge chaqirip nida qilghin, ular piyade we uruq tögilerge minip kélidu, uruq tögiler yiraq yollarni bésip kélidu.» hej sürisi, 27 - ayet.

allah  taala hej ibaditini er - ayal pütkül musulmanlargha ömride eng az bir qétim ada qilishni perz qildi. shunga, allahning bu buyruqining teqezzasigha binaen, sharaiti yar bergen musulmanlar hej ibaditini ada qilish üchün mekkige baridu.

hej islamning besh shertidin biri bolup, her yili hej mewsumide milyonlarche insan allahning bu emrini orundash üchün mekkige baridu.

allah sharaiti yar bergen musulmanlarni hej ibaditini ada qilishqa emr qilmaqta. her yili kebide yighilghan musulmanlar ibrahim eleyhissalamning yolidin mangidighanliqliri, allahning pütkül emr – permanlirigha bijanidil boysunidighanliqliri, durus bolidighanliqliri we allahning raziliqi üchün arzu – armanliri, hawayi - hewesliri we nepsiliridin waz kéchidighanliqliri toghruluq allah taalagha wede béridu.

musulmanlar hej ibaditini ada qilip qaytip kelgendin kéyin, nahayti shepqetlik méhriban allahqa bergen wediliride turushqa tirishidu, buning türtkiside kündilik hayatini téximu menilik, téximu behuzur ötküzüshke bashlaydu.