абдуллайев: түркийәниң иқтисадий тәрәққийатиға ишинимиз

әзәрбәйҗан дөләтлик нефит ширкитиниң башлиқи рөвнаг абдуллайев  түркийәниң иқтисадий тәрәққийатиға ишинидиғанлиқлирини ейтти.

абдуллайев: түркийәниң иқтисадий тәрәққийатиға ишинимиз

түркийә авази радийоси хәвири: абдуллайев әзәрбәйҗанниң тәбиий газини түркийә арқилиқ йавропаға йәткүзидиған транс анадолу тәбиий газ туруба линийәси лайиһәсиниң, тәбиий газ билән тәминләшниң дәсләпки нуқтиси болған әскишәһир компрессор вә өлчәш понкитида өткүзүлгән мурасимда қилған сөзидә, әзәрбәйҗан дөләтлик нефит ширкитиниң түркийәниң әң чоң ташқи мәбләғ салғучилиридин бири икәнликини, лайиһәниң икки дөләт оттурисида ташланған муһим қәдәмләрдин бири икәнликини тәкитләп мундақ деди: «бу лайиһә арқилиқ <бир милләт, икки дөләт> сөзиниң тоғрилиқи испатланди. әзәрбәйҗан дөләтлик нефит ширкити түркийә билән әзәрбәйҗандин ибарәт икки қериндаш дөләт оттурисидики сода мунасивәтлирини йәниму күчәйтиш, истиратегийәлик сәрмайиләрни қоллаш үчүн муһим вәзипиләрни өз үстигә алди. ширкитимиз енергийә саһәсидики селинмилири билән түркийәниң әң чоң ташқи мәбләғ салғучисидур. биз түркийәгә вә түркийәниң иқтисадий тәрәққийатиға һәмишә ишәндуқ, буниңдин кейинму давамлиқ ишинимиз. транс анадолу тәбиий газ туруба линийәси лайиһәси бу ишәнчкә тайинидиған достлуқимиз һәм һәмкарлиқимизниң муһим бир намайәндиси сүпитидә һәрикәткә өтти. әзәрбәйҗандин тартип италийәгичә созулидиған 3 миң 500 кивадрат километирлик җәнубий тәбиий газ каридориниң муһим бир қисми болған транс анадолу тәбиий газ туруба линийәси лайиһәси қурулуши муһим бир қурулуштур. бу ширкитимиз үчүн наһайити чоң синақ иди, бу синақтин мувәппәқийәтлик һалда өтүш үчүн тиришчанлиқ көрсәттуқ, дәрвәқә, буниң нәтиҗисиниму көрдуқ. лайиһә дәл вақтида вә 8 милйард доллардин аз мәбләғ билән ишқа ашурулди.»

транс анадолу тәбиий газ туруба линийәси лайиһәсиниң түркийәниң тәбиий газ еһтийаҗиниң тәхминән % 12 тини қамдайдиғанлиқини әскәрткән абдуллайев мундақ дәп көрсәтти: «бу лайиһәниң әсли пиланлиғучилири түркийә җумһур рәиси рәҗәп таййип әрдоған билән пирезидент илһам әлийевдур, дөләт башлиқлириниң қоллиши вә қәтий ирадиси болмиса, бизгә йол көрсәтмигән болса,  бу лайиһәниң қисқа вақит ичидә тамамлиниши мумкин болмайтти.»



مۇناسىۋەتلىك خەۋەرلەر