türkiye xitaygha qattiq naraziliq bildürdi

türkiye kishilik hoquqni éir derijide depsende qilghanliqi seweblik xitaygha qattiq naraziliq bildürdi we béyjingni enqerening uyghurlar duch kéliwatqan kishilik hoquq depsendichiliklirige alaqidar inkaslirini nezerge élishqa chaqirdi.

türkiye xitaygha qattiq naraziliq bildürdi

türkiye awazi radiyosi xewiri: türkiye tashqi ishlar ministirliqi bayanatchisi hami aqsoy, uyghur türklirige qaritilghan éghir derijidiki kishilik hoquq depsendichilikliri toghruluq élan qilghan yazma bayanatida, mundaq dédi: «uyghur aptonom rayonidiki uyghur türklirining we bashqa musulman xelqlerning asasliq kishilik heq – hoquqlirini depsende qilidighan bésimlar, bolupmu yéqinqi ikki yildin buyan barghanséri küchiyip ketti we xelqara jemiyetning küntertipidin orun aldi.»

xalighanche tutqun qiliniwatqan bir milyondin artuq uyghur türkining yighiwélish lagérlirida we türmilerde qiyin – qistaqlar, ten jazaliri we ménge yuyush qatarliq jazalargha duch kéliwatqanliqi, buning emdi héchkimge sir emesliki tekitlengen bayanatta, yighiwélish lagérlirining sirtidiki uyghurlarningmu qattiq bésimgha duch kéliwatqanliqi eskertilip mundaq déyildi: «chet ellerde (xitay sirtidiki döletlerde) yashawatqan uyghur qérindashlirimiz we puqralirimiz bu rayondiki uruq – tughqanliridin xewer alalmaywatidu, minglarche uyghur balilar ata – aniliridin yiraqlashturulup, yétim qalduruluwatidu, 21 – esirde yighiwélish lagérlirining qaytidin otturigha chiqishi we xitay dairilirining uyghur türklirige qaratqan sistémiliq haldiki assimilyatsiye siyasiti insanliq namidin qattiq nomus qilarliq ishtur. uyghur aptonom rayonida yüz bériwatqan insaniy tiragédiyege munasiwetlik qarashlirimizni xitay dairilirigha her sewiyede yetküzduq.»

bayanatta yene, mundaq déyildi: «mana mushundaq bir peytte, bir naxshisi sewebidinla 8 yilliq qamaq jazasigha höküm qilinghan xelq naxshichisi abduréhim héytning türmige tashlinip ikkinchi yiligha qedem qoyghanda wapat bolghanliqidin cheksiz qayghu – hesret ichide xewer taptuq. bu échinishliq hadise, türkiye xelqi we keng jamaetchilikining uyghur aptonom rayonidiki éghir derijidiki kishilik hoquq depsendichilikliri mesilisidiki naraziliqini téximu kücheytiwetti. bu heqliq naraziliqning xitay dairiliri teripidin nezerge élinishini kütüwatimiz, xelqara jemiyet bilen birleshken döletler teshkilati bash katipinimu uyghur aptonom rayonidiki insaniy tiragédiyege xatime bérilishi üchün paal heriketke ötüshke chaqirimiz.»


خەتكۈچ: naraziliq , xitay , türkiye

مۇناسىۋەتلىك خەۋەرلەر