erdoghan tramp bilen téléfonda körüshüp ikki dölet munasiwetliri we süriye toghrisida sözleshti
jumhur reis rejep tayyip erdoghan, türkiyening süriyening munbich nahiyesining amanliqini saqlash wezipisini waqitni qoldin bermestin ötküzüwélishqa teyyar ikenlikini bildürdi.
türkiye awazi radiyosi xewiri: jumhur reis erdoghan amérika qoshma ishtatliri pirézidénti donald tramp bilen téléfonda körüshti.
jumhur reislik mehkimisi menbeliridin igilengen uchurgha asaslanghanda, téléfon söhbitide, ikki dölet munasiwetliri we süriyening nöwettiki weziyiti toghrisida pikir almashturulghan؛ söhbette ötken hepte munbichta meydangha kelgen xainlarche térrorluq hujumida jénidin ayrilghan amérikiliqlar üchün teziye tileklirini ipadiligen erdoghan, bu échinishliq weqening, amérika qoshma ishtatlirining süriyedin esker chékindürüsh qararigha tesir körsitish meqsetlik bir qutratquluq ikenlikini tilgha élip ötken.
erdoghan, türkiyening munbich rayonining amanliqini saqlash wezipisini waqit zaye qilmastin ötküzüwélishqa teyyar ikenlikini, bölgünchi térrorluq teshkilati p k k we p k k ning süriyediki quyruqlirining bu döletning sherqiy shimalini muqimsizlashturush heriketlirige yol qoyulmaydighanliqini tekitlep ötken.
ikki rehber, daésh térrorluq teshkilatining süriyediki qalduqlirini tazilash we qaytidin otturigha chiqishining aldini élish tedbirlirini birlikte yolgha qoyush toghrisida birdeklik hasil qilghan.
jumhur reis erdoghan bilen pirézidént donald tramp, türkiye we amérika qoshma ishtatliri armiye bash ishtab bashliqlirining bixeter rayongha alaqidar dawamlishiwatqan kéngesh musapisining süritini ashurghan halda dawamlashturulushi we ikki terep soda hejimini ashurush toghrisida hempikir ikenlikini özara ipadileshken.
