йилдирим америкиға наразилиқ билдүрди

түркийә бүйүк милләт мәҗлиси башлиқи  бинали йилдирим америка қошма иштатлириниң террорлуқ тәшкилати п й д/й п г  гә йардәм беришигә иранда наразилиқ билдүрди.

йилдирим америкиға наразилиқ билдүрди

түркийә авази радийоси хәвири: бинали йилдирим теһранда чақирилған «терроризмға қарши  күрәш вә районлуқ  һәмкарлиқни йәниму күчәйтиш» темилиқ 2 – нөвәтлик парламент башлиқлири йиғинида қилған сөзидә, америка қошма иштатлириниң террорлуқ тәшкилати п й д/й п г гә йардәм беришигә наразилиқ билдүрүп мундақ деди: «бир террорлуқ тәшкилатиға қарши  күрәш қилиш үчүн башқа бир террорлуқ тәшкилати билән һәмкарлишиш қандақму әқилғә сиғиду?»

иран пирезиденти һәсән руһани йиғинниң ечилишида қилған сөзидә, америка қошма иштатлириниң дөлитигә қарита йүргүзүватқан ембарголирини қаттиқ тәнқид қилди.

иран ташқи ишлар министири муһәммәд җәвад зариф йиғин һарписида елан қилған байанатида, мундақ деди: «америка қошма иштатлири район дөләтлиригә еһтийаҗтин артуқ қорал - йарағ сатти, бу америка қошма иштатлириниң районға қарита йолға қойуватқан сийаситиниң қанчилик дәриҗидә хәвплик икәнликини көрситиду, шу вәҗидин, районда тинчлиқ орнитилиши уйақта турсун, әксичә, район күндин – күнгә вәйран болуватиду. вашингтон түрлүк баһаниләр билән районға наһайити көп қорал – йарағларни әвәтиватиду, бу қорал – йарағлар йәмәндә әлқаидәниң, сүрийәдә даешниң қолиға өтүп кетиватиду. буни биз йавропа гезитлиридин оқуватимиз, бу әһвал бихәтәрликимизгә давамлиқ тәһдит шәкилләндүрмәктә.»

түркийә, иран, русийә, хитай, пакистан вә афғанистан қатарлиқ дөләтләрниң парламент башлиқлириниң иштирак қилишида теһранда чақирилған йиғинда, иран, русийә вә түркийәниң сүрийәдики  үнүмлүк паалийәтлириниң наһайити зор әһмийәткә игә икәнлики тәкитләнди.



مۇناسىۋەتلىك خەۋەرلەر