әрдоған трамп билән өткүзгән учришиши тоғрисида мәлумат бәрди

җумһур рәис рәҗәп таййип әрдоған, америкиниң бөлгүнчи террорлуқ тәшкилати й п г / п к к тоғрисида өз ичидә бир алақә мәсилиси барлиқини тәкитлиди.

әрдоған трамп билән өткүзгән учришиши тоғрисида мәлумат бәрди

түркийә авази радийоси хәвири: җумһур рәис әрдоған, 10 -, 11- нойабир күнлири биринчи дунйа урушиға хатимә бәргән уруш тохтитиш келишиминиң 100 йиллиқини хатириләш паалийәтлиригә иштирак қилиши үчүн барған фирансийәниң пайтәхти париждин қайтишида айропиланда мухбирларниң соаллириға җаваб бәрди. у, америка пирезиденти доналд трамп билән парижда өткүзгән учришишида сүрийәдики өзгиришләр тоғрисида сөзләшкәнликини әскәртти.

трампниң «идлиб мәсилисигә алаһидә әһмийәт беримиз. у йәрдики утуқлириңларға йуқири баһа беримиз, мәдһийәләймиз» дегәнликини билдүргән әрдоған, «маңа, (америкилиқ әмәлдарлар арисида) й п г вә бәзи мәсилиләрдә өз арисида бир учур – алақә мәсилиси бардәк туйулди. (трампқа) <бу мәсилидиму бирликтә қилидиған нурғун ишлиримиз болуши мумкин> дедим» дегән ибариләрни ишләтти.

сүрийәдә фират дәрйасиниң шәрқидики й п г / п к к тәшкилати тоғрисида тохталған әрдоған, бу мәсилини һәл қилиш үчүн америкилиқ әмәлдарлар билән ташқи ишлар вә мудапиә министирлиқлири арисида сөһбәтләрниң өткүзүлидиғанлиқини әскәртти.

әрдоған, мухбирларниң, америка қошма иштатлириниң бөлгүнчи террорлуқ тәшкилати п к к ниң үч каттибеши тоғрисида учур билән тәминлигүчиләргә мукапат беридиғанлиқини елан қилиши тоғрисидики қаришиға мунасивәтлик соалиғиму җаваб бәрди.

америка қошма иштатлириниң бу қарариға «толиму кечикип кәткән бир қәдәм» дәп баһа бәргән әрдоған, буниңға, америкилиқларниң й п г билән п к к ни бир – биридин пәрқлиқ тәшкилатлардәк қилип көрситип, й п г ни қанунийлаштуруш үчүн оттуриға чиқирилған бир ойун, дәп қарайдиғанлиқлирини билдүрди.



مۇناسىۋەتلىك خەۋەرلەر