erdoghan «kommérsant» ning soallirigha jawab berdi

jumhur reis rejep tayyip erdoghan, türkiyening herqandaq shert – sharait astida chégraning herqandaq bir yéride térrorgha yol qoymaydighanliqini éytti.

erdoghan «kommérsant» ning soallirigha jawab berdi

türkiye awazi radiyosi xewiri: jumhur reis erdoghan, rusiyening kommérsant gézitining ziyaitini qobul qilip, süriye mesilisini hel qilish musapisige alaqidar mesililer toghrisida toxtaldi. u, térrorizmgha qarshi küresh toghrisida toxtilip, «rusiyeningmu, türkiyening p k k, p y d / y p g we d s g gha oxshash bölgünchi térrorluq teshkilatlirigha qarshi kürishini qollishini ümid qilimiz» dédi.

türkiyening térrorizmgha qarshi küresh iradisining qetiy ikenlikini tekitligen erdoghan, dölitining iradisini afrin, jerablus, elbab we idlib rayonliridiki térrorizmgha qarshi kürishide köp qétim jezmleshtürgenlikini eskertti.

17 – séntebirde rusiyening sochi shehiride rusiye pirézidénti wiladimir putin bilen ötküzgen uchrishishida, bu mesilige qanchilik ehmiyet bérilidighanliqining tekitlep ötülgenlikini tilgha alghan jumhur reis erdoghan, «türkiyening bu térrorluq teshkilatlirigha qarshi kürishini rusiyeningmu qollishini ümid qilimiz» dédi.

erdoghan, rusiyening bilen ornitilghan hemkarliqlarning aldimizdiki mezgillerdimu aktip halette rawajlinidighanliqigha ishnidighanliqini tekitlep ötti.

«mötidil öktichilerni <térrorchi> hésablap yoqitishni nishan qilghan hertürlük urunushqa qarshi ikenlikimizni köp qétim otturigha qoyduq» dégen erdoghan, idlibtiki mötidil öktichilerning mesilini siyasiy yol bilen hel qilish musapisige qétilishi kéreklikini, buning jenwe we astana söhbetlirining normal halette rolini jariy qilduralishi üchün zörür ikenlikini éytti.

u, musapirlar mesilisi toghrisidimu toxtilip, «dunyamizning qanliq jarahiti boluwatqan bu mesilige peqet türkiyening mesilisidekla muamile qilish toghra emes» dédi.

erdoghan söhbetning axirida, türkiye – rusiye munasiwetlirining yéqinqi mezgillerde yaxshi qoshnidarchiliq, ortaq menpeetler we özara hörmet dairiside güllinishni dawamlashturuwatqanliqidin memnun ikenlikini ipadilep, «ortaq énérgiye layiheliri we özara sélinmilar bashta bolup, insaniy we medeniyet munasiwetlirimizningmu güllinishi üchün kéreklik qedemlerni tashlawatimiz. buningdin kéyinmu bu qedemlerni tashlashni dawamlashturimiz. bir rayonda teng yashap, esirler boyiche tarixning témisi bolup kelgen türk we rus xelqlirining chongqur, semimiy shundaqla yéqin munasiwet ichide bolushi kéreklikige ishinimen. bu muddiani yaqlighan halda qilinghan xizmetlerni herdaim qollaydighanliqimizni tekitlep ötüshni xalaymen» dégenlerni qeyt qildi.


خەتكۈچ: rusiye , türkiye , erdoghan

مۇناسىۋەتلىك خەۋەرلەر