түркийә, алақидар тәрәпләрни идлибтики барлиқ һәрбий һәрикәтләргә хатимә беришкә чақирди

түркийәниң б д т да турушлуқ даимий вәкили фәридун синирлиоғлу, б д т хәвпсизлик кеңишидә алақидар тәрәпләрни сүрийәниң идлиб районидики барлиқ һәрбий һәрикәтләргә хатимә беришкә вә уруш тохтитиш елан қилишқа чақирди.

түркийә, алақидар тәрәпләрни идлибтики барлиқ һәрбий һәрикәтләргә хатимә беришкә чақирди

түркийә авази радийоси хәвири: фәридун синирлиоғлу, русийәниң тәлипигә асасән чақирилған б д т  хәвпсизлик кеңиши йиғинида, җумһур рәис рәҗәп таййип әрдоған, русийә пирезиденти виладимир путин вә иран пирезиденти һәсән руһаниниң җүмә күни теһранда өткүзгән башлиқлар йиғининиң нәтиҗиси тоғрисида әза дөләтләргә мәлумат бәрди.

астана сөһбәтлириниң сүрийәдә зораванлиқни азайтип, сийасий мусапиниң сүритини ашуруш мәқситидә өткүзүлгәнликини әслитип өткән синирлиоғлу, теһран йиғинидиму идлиб мәсилисиниң алдинқи пиландин орун алғанлиқини вә җумһур рәис әрдоғанниң теһранда уруш тохтитиш елан қилишқа чақирғанлиқини қәйт қилғандин кейин, йәнә бир қетим алақидар тәрәпләрни идлибтики барлиқ һәрбий һәрикәтләргә хатимә берип, уруш тохтитиш елан қилишқа чақирди. у мундақ деди: «уруш тохтитиш чақириқимиз барлиқ һәрбий һәрикәтләрни өз ичигә алиду вә түркийә бу йөнилиштики хизмәтлирини давамлаштуриду. хәлқара җәмийәтниму җараңлиқ вә актип һаләттә тиришчанлиқлиримизни қоллап – қуввәтләшкә чақиримиз» деди.

фәридун синирлиоғлу сөзини давамлаштуруп, «идлибқа қилинидиған һәрбий һәрикәтләр шубһисизки инсаний паҗиә йаритиду, мусапирлар еқинини башлитиду, түркийә, йавропа вә униңдин һалқиған районларда бихәтәрлик тәһдитлири пәйда қилиду» дәп агаһландурди.

түркийәниң 3 йерим милйон киши билән дунйада әң көп мусапирға саһибханлиқ қиливатқан дөләт икәнликини хатирилитип өткән синирлиоғлу, «бирақ шуниң биләнму йүзлишәйли؛ биз хели бурунла қурбимизниң йуқири сизиқиға йетип болдуқ» деди.

идлибтики милйонларчә бигунаһ инсанниң һайатиниң хәвпкә иттирилишигә йол қойулмаслиқи лазимлиқини тәкитлигән синирлиоғлу, «бу хәлқара җәмийәтниң ортақ вәзиписи. нөвәттә идлибта бизни әндишә ичидә көзитиватқанлар террорчи әмәс, 3 йерим милйон пуқра вә буниң 1 милйони балилардур. уларни үмидсизликкә дучар қилсақ болмайду» дегәнләрни қәйт қилди.



مۇناسىۋەتلىك خەۋەرلەر