әрдоған вал ситрит җурналда мақалә елан қилип, хәлқара җәмийәтни идлиб тоғрисида агаһландурди

җумһур рәис рәҗәп таййип әрдоған, сүрийәниң идлиб шәһиригә қилинидиған һуҗумниң, түркийә, йавропаниң қалған җайлири вә башқа районларда еғир инсаний вә хәвпсизлик тәһдитлирини пәйда қилидиғанлиқини ейтти.

әрдоған вал ситрит җурналда мақалә елан қилип, хәлқара җәмийәтни идлиб тоғрисида агаһландурди

түркийә авази радийоси хәвири: җумһур рәис әрдоған америкида чиқидиған вал ситрит җурналда елан қилинған мақалисидә, «идлибқа һуҗум қилишниң аламәтлири көрүнүватқан мушундақ бир пәйттә хәлқара җәмийәт мәсулийитини тонуп йетиши лазим. пассип турушниң бәдили еғир болиду. сүрийә хәлқини бәшшар әсәдниң мәрһәмитигә ташлап қойсақ болмайду» дегән ибариләргә орун бәрди.

әрдоған,  вал ситрит җурнал гезитигә йазған идлиб шәһириниң нөвәттики вәзийити вә түркийәниң бу мәсилигә мунасивәтлик позитсийәси тоғрисидики «дунйа әсәдни тохтитиши лазим» сәрләвһилик мақалисидә, идлиб мәсилисидә түркийәниң қолидин кәлгән ишларни йәткүчә қилғанлиқини, бәшшар әсәд һакимийитиниң йеқинқи 7 йилдин буйан сүрийәдә қиливатқан қилмишлириниң очуқ – ашкара икәнликини қәйт қилди.

әрдоған, әсәд һакимийитиниң йеқинлишиватқан идлиб һуҗуми тоғрисида тохтилип, «һакимийәтниң идлибкә һуҗум қилиштики ғәризи, һәқиқий вә паал рәвиштә терроризмға қарши күрәш сәпәрвәрлики қозғаш әмәс, қара – қуйуқ һалда өктичиләрни йоқитип ташлаштин ибарәттур» деди.

җумһур рәис әрдоған мақалисидә йәнә, «идлиб, көврүктин илгирики ахирқи чиқиш еғизидур. әгәр йавропа вә америка қошма иштатлири һазир һәрикәткә өтүштә мәғлубийәткә учриса, пәқәт бигунаһ сүрийәликләрла әмәс, пүткүл дунйа бәдилини төләшкә мәҗбур болуп қалиду. түркийә йенидики қирғинчилиқни тохтитиш үчүн пүтүн күчи билән қолидин кәлгән ишларни қилди» дегәнләрни тәкитлиди.

түркийәниң 3 йерим милйондин артуқ сүрийәликкә саһибханлиқ қилғанлиқиға ишарәт қилған әрдоған, «охшаш вақитта йенимиздила паалийәт елип бериватқан террорлуқ тәшкилатлириниңму һуҗум нишани болдуқ؛ аталмиш ислам дөлити (даеш) вә (бөлгүнчи террорлуқ тәшкилати) п к к. нә инсаний йардәмләрниң еғир бәдили, нә хәвпсизлик әндишлири қәтий позитсийәмизни аҗизлиталмиди» дәп йазди.

идлиб мәсилиси тоғрисида америка қошма иштатлириға хитаб қилған әрдоған, москва вә теһранғиму чақириқ қилди. у сөзини давамлаштуруп, «(диққитини) химийәлик қорал һуҗумилириға мәркәзләштүргән америка қошма иштатлириниң, өлүкләр арисида халиғанчә дәриҗигә қарашни рәт қилиши лазим. аммивий қораллар техиму көп өлүмниң җавабкаридур, лекин йенимиздики қәтлиамни тохтитиш мәҗбурийити пәқәт ғәрбниңла йәлкисидә әмәс. астана мусаписидики шериклиримиз русийә билән иранниңму бу инсаний паҗиәни тохтитиш мәҗбурийити бар» дегәнләрни қәйт қилди.

әрдоған мақалисидә йәнә, «әсәд һакимийити өз һуҗумлирини терроризмға қарши күрәш земинда қанунлаштурушқа урунмақта. бу нуқтида хаталашмаңлар؛ терроризмға қарши күрәштә түркийәдинму бәкрәк тәқдирләшкә тегишлик һечбир бир дөләт йоқтур. бәшшар әсәдниң һәл қилиш чариси хатадур. бигунаһ кишиләр терроризмға қарши күрәш нами астида қурбан қилинмаслиқи керәк. бу, пәқәт ашқунлуқ вә терроризмға йеңи имканийәтләрни йаритип бериду. даешниң оттуриға чиқиши сүрийәдә йүз бәргән ишларниң сәвәби әмәс мәһсули иди» дегән ибариләргә орун аҗратти.

идлибта һәйәти тәһрирушшамға охшаш террорлуқ тәшкилатлири актип һәрикәт қиливатқан җайларниң барлиқиға, бирақ бу унсурларниң район нопусиниң пәқәт бир қисминила тәшкил қилидиғанлиқиға ишарәт қилған әрдоған, терроризмға қарши күрәш қилғанда, пуқраларға зийан йәткүзмәсликни капаләткә игә қилишниң мумкинликини, түркийәниң даеш вә п к к ға қарши күришидә буниң үлгилириниң намайан болғанлиқини әскәртип өтти.



مۇناسىۋەتلىك خەۋەرلەر