chawushoghlu tereplerni süriyede mesilini tinchliq bilen hel qilishqa chaqirdi

türkiye tashqi ishlar ministiri mewlüt chawushoghlu süriye weziyitining hemmige munasiwetlik ikenlikini alahide tekitlep, mezkur mesilide oxshash pikirge ige döletler bilen birlikte tirishchanliq körsitiwatqanliqlirini éytti.

chawushoghlu tereplerni süriyede mesilini tinchliq bilen hel qilishqa chaqirdi

türkiye awazi radiyosi xewiri: mewlüt chawushoghlu ruméniye paytexti buxaréstta ötküzülgen türkiye-ruméniye-polsha tashqi ishlar ministirliri yighinidin kéyin, ruméniye tashqi ishlar ministiri téyodor méléskanu we polsha tashqi ishlar ministiri jajék jzaputowijz bilen birlikte axbarat élan qilish yighini ötküzdi.

u idlibqa beshshar esed hakimiyiti bilen rusiyening toxtimay hujum qiliwatqanliqini eskertip: «teklipimiz nahayiti éniq. idlibtiki hujumlar toxtisun, térrorluq guruppilirining mewjudiyitini yoqitish üchün birlikte tirishishimiz kérek» dédi.

u sözini mundaq dawamlashturdi:

«süriyede eng yaxshi hel qilish charisi bolghan <siyasiy yol> gha yétishte muhim ilgirileshlerni qolgha keltürelmisek, beshshar esed hakimiyiti bilen uning qollighuchiliri herbiy charige ishinidu. astana bilen sochida zor tirishchanliqlarni körsetken bolsaqmu, téhranda qirghinchiliqning aldini élish üchün bir yerge jem bolghan bolsaqmu, epsuski beshshar esedning hujumliri dawam qiliwatidu. néme üchün shunchiwala köp puqralarni, ayallar we kichik balilarni öltürüsh kérek? shunga bu mesilide birlikte tirishchanliq körsitishimiz kérek.»

u rusiye, iran, amérika, firansiye we engliyedin bashqa süriyede bashqa hemrahlar bilenmu birlikte tirishchanliq körsitishike teyyar ikenliklirini tekitlidi. u türkiye bolush süpitiide, süriye weziyitining axirlishishi we mesililerning tinchliq usulda hel qilinishi üchün rusiyeni öz ichige alghan halda iran qatarliq döletler bilen köp tereplik tirishchanliqlarni körsitiwatqanliqini qeyt qildi.

u süriyening zémin pütünlükini qollaydighanliqlirini eskertip, mundaq dédi:

«biraq, bigunah kishilerni, ayallar we kichik balilarni qirghin qilish, zémin pütünlükini qoghdashning usuli emes. barliq tereplerge beshshar esed hakimiyitining hujumlirigha qarshi awazini yuqiri kötürüshke, mesilige tinchliq yoli bilen chare tépishqa chaqirimen.»



مۇناسىۋەتلىك خەۋەرلەر