dunya taratquliri téhran bashliqlar yighinini yéqindin közetti

jumhur reis rejep tayyip erdoghanning süriyening idlib shehiri toghrisidiki «insaniy kirizis agahlandurushi» dunya taratqulirida küchlük ghulghula qozghidi.

dunya taratquliri téhran bashliqlar yighinini yéqindin közetti

türkiye awazi radiyosi xewiri: jumhur reis erdoghanning 7 – séntebirde iranning paytexti téhranda chaqirilghan türkiye – iran – rusiye üch terep bashliqlilar yighinidiki «idlibning qan kölige aylinishini xalimaymiz. bir urush toxtitishqa qarap qedem tashlash nahayiti paydiliqtur» dégen sözliri küchlük ghulghula qozghidi.

türkiyening insaniy pozitsiyesi hem gherb hem ereb taratqulirida keng orun aldi؛ amérikida chiqidighan washington pochtisi géziti, jumhur reis erdoghanning «idlibqa hujum qilish pajie bilen axirlishidu» dégen sözlirige orun berdi.

roytérz xewer agéntliqi, erdoghanning «ölümlerge bir bolungda qarap turmaymiz» dégen sözlirini bash mawzu qilghan bolsa, b b s qanili «idlibning qan köli bolushini xalimaymiz» dégen sözlirige orun berdi.

engliyening skay nyuz téléwiziyesi, idlibte yüz bergüsi ishlardin eng köp endishe qiliwatqan döletlerdin birining türkiye ikenlikini tekitlidi؛ türkiyening hazirghiche milyonlarche musapirni qobul qilghanliqi eslitip ötülgen xewerde, enqerening idlibtin yéngi bir musapirlar dolqunining kélishini xalimaydighanliqi eskertildi.

firansiyede chiqidighan lé mondé géziti, «téhran bashliqlar yighinining meghlub bolushidin kéyin, idlibte tetur sanaq bashlandi» dégenlerni qeyt qildi.

gérmaniyede chiqidighan «Deutschlandfunk»  gézitimu, jumhur reis erdoghanning urush toxtitish élan qilishni telep qilghanliqini we süriye hakimiyiti idlibqa hujum qilghan teqdirde, rayonning qan kölige aylinip kétidighanliqini éytip agahlandurghanliqini yazdi.

gollandiye médiya orgini – nos bolsa, iran bilen rusiyening idlibni fethi qilish üchün herbiy heriket ishiklirini ochuq qaldurghanliqini, türkiyening bolsa, urush toxtitish élan qilishni telep qilghanliqini bildürdi.

rusiye médiya orgini sputnik bolsa, erdoghanning «meqsitimiz idlib mesilisini astana rohigha uyghun shekilde tinch usul bilen hel qilish» dégen sözlirige orun berdi.

ereb médiyasida erdoghanning insaniy kirizis toghrisidiki sözliri aldinqi pilandin orun aldi؛ merkizi qatargha jaylashqan eljezire qanili, jumhur reis erdoghanning «idlibte put – qolimiz baghlanghan halette turmaymiz» dégen sözlirini bash mawzu qildi.

iraqning döletke qarashliq géziti «sabah» bolsa, enqerening siyasiy we jughrapiyelik muqimliq kapaletke ige qilinghuche tirishchanliq körsitishni dawamlashturidighanliqi toghrisidiki pozitsiyesini oqurmenliri bilen ortaqlashti.

liwanda chiqidighan «jumhuriyet géziti» mu jumhur reis erdoghanning yéngi bir köchmenler dolquni toghrisidiki agahlandurushigha orun berdi.



مۇناسىۋەتلىك خەۋەرلەر