türkiye bilen gollandiye munasiwetlerni normallashturushni qarar qildi

türkiye tashqi ishlar ministiri mewlüt chawushoghlu türkiye-gollandiye munasiwetlirini normallashturush toghrisida élinghan qarar toghrisida melumat berdi.

türkiye bilen gollandiye munasiwetlerni normallashturushni qarar qildi

türkiye awazi radiyosi xewiri: türkiye tashqi ishlar ministiri mewlüt chawushoghlu nato aliy rehberler yighini daireside gollandiye tashqi ishlar ministiri stéf blok bilen körüshüp, 2017-yili mart éyida yüz bergen we ikki dölet munasiwetlirige ziyan salghan u köngülsiz weqeler üstide sözleshkenlikini bildürdi.

u körüshüshte, istratégiyelik shériklikke tayanghan köp tereplimilik munasiwetlerge ziyan salghan mesililerni hel qilishning, her ikki terepning ortaq arzusi ikenlikining tekitlengenlikini qeyt qildi. u: "körüshüshimizde munasiwetlirimizini normallashturush üchün qedem tashlash heqqide mesuliyetni üstige alghan gollandiye tashqi ishlar ministiri manga bir mektup ewetip, munasiwetlerni normallashturush arzusini bildürdi. mektuptin kéyin téléfonda körüshtuq we munasiwetlerni normallashturushning yolini échish üchün tashlinidighan qedemler üstide pikir birliki hasil qilduq. bu ramkida, tunji qedem süpitide ortaq bayanat élan qilishni qarar qilduq. bash elchilirimizni qisqa waqit ichide özara teyinlesh heqqide pikir birliki hasil qilduq. döletlirimiz otturisidiki diyalog we özara ishenchni qaytidin turghuzush üchün we munasiwetlirimizni burunqi sewiyege yetküzidighan pilanlarni belgilesh üchün stéf blokni türkiyege teklip qildim. bu ziyaret pat arida emelge ashqusi" dédi.

tashqi ishlar ministiri mewlüt chawushoghlu gollandiyede 450 ming türkiye puqrasining yashaydighanliqini xatiriletken halda, türkiyede eng chong biwaste meblighi bolghan gollandiye bilen munasiwetlerni ongshashta, tashqi siyasette her daim bolghinidek milliy menpeetler boyiche heriket qilidighanliqlirini tekitlidi.

mewlüt chawushoghlu gollandiye bilen munasiwetlerning bundin kéyinki tereqqiyati üchün bir heriket pilanining belgilinidighanliqini eskertti.

gollandiye hökümiti 2017-yili türkiyediki asasiy qanun référandum mezgilide gollandiyede yashawatqan türkiye puqraliri bilen körüshüp nutuq sözleshni pilan qilghan mewlüt chawushoghluning ayropilandin chüshüsh ruxsitini emeldin qalduruwetken idi.

gollandiye hökümiti oxshashla yene, eyni waqitta aile we ijtimaiy parawanliq siyasetliri ministiri fatma betül sayan kayaghimu 2017-yil 11-mart rottérdamdiki türkiye konsulxanisigha kirishige ruxset qilmighan we qoghdighuchilirini tutup, özini saqchilarning qoghdishi astida gérmaniyege kétishke mejburlighan.

türkiye buninggha qarita, chet elde sayahet qiliwatqan gollandiyening enqerediki bash elchisini türkiyege qaytishini chekligen. shuningdin kéyin, ikki döletning diplomatik munasiwetliri "meslihetxana" derijisige töwenligen idi.



مۇناسىۋەتلىك خەۋەرلەر