chawushoghlu türkiyening S-400 ge alaqidar pozitsiyesini nahayiti roshen shekilde otturigha qoydi

türkiye jumhuriyiti tashqi ishlar ministiri mewlüt chawushoghlu, rusiyedin sétiwélinidighan S-400 mudapie sistémilirining tunji batariyelirining aldimizdiki yilning axirida türkiyege kélidighanliqini éytti.

chawushoghlu türkiyening S-400 ge alaqidar pozitsiyesini nahayiti roshen shekilde otturigha qoydi

türkiye awazi radiyosi xewiri: türkiye tashqi ishlar ministiri mewlüt chawushoghlu, shimaliy atlantik ehdi teshkilati – nato bashliqlar yighinigha ishtirak qilish üchün barghan bélgiyening paytexti biryussélda metbuat mensuplirining soallirigha jawab berdi.

rusiyedin S-400 mudapie sistémiliri sétiwélinidighandin kéyin, peqet amérikila emes, natogha eza bezi döletlerningmu bu ishning toghra – xataliqi toghrisida her xil bayanatlarni bergenlikige isharet qilghan chawushoghlu, «mesilining téxnik qismini chüshinimiz. mesilen, S-400 mudapie sistémilirining natoni we nato sistémilirini, ittipaqdashlirini düshmen, dep tonup – tonumaydighanliqini sorashliri yaki buni chüshinishke urunushi normal ish. bu mesilide bizmu nahayiti sezgürmiz. alghan chéghimizdimu buninggha alaqidar shertlirimizni otturigha qoyduq. bu bizning jiddiy éhtiyajimiz idi. bu éhtiyajni ittipaqdashlirimiz arqiliq qanduralmighanliqimiz üchün, rusiyedin alghanliqimizni, eng muwapiq bahanimu rusiyening qoyghanliqini, netijide türkiyening musteqil we erkin bir dölet ikenlikini, öz qararini özining chiqiridighanliqini éyttuq» dédi.

chawushoghlu, «türkiye natodin yiraqliship kétermu?» dégendek endishilerni qobul qilmaydighanliqlirini eskertip, «yaq, türkiye natodin yiraqlashmaydu. eger nato ittipaqdashlirimiz bu éhtiyajimizni qamdighan bolsa idi, biz ulardin alattuq, ularni aldinqi orungha qoyghaniduq» dédi we sözini dawamlashturup, «aldimizning yilning axirlirida tunji türküm batariyeler kélidu. emdi buning soraq qilinishigha kérek yoq» dégenlerni qeyt qildi.

nöwette nato we uning ittipaqdashlirigha xewp yetküzüwatqan birinchi amilning térrorluq teshkilatliri ikenlikini tekitligen chawushoghlu, natoning térrorizmgha qarshi küreshte ünüm hasil qilghuchi tedbirlerni yolgha qoyushi kéreklikini éytti.

u yene, natoning nöwette bolupmu ittipaqdash döletlerning muqimliqini qoghdash yolida muhim rol oynishi kéreklikini sözlirige ilawe qildi.


خەتكۈچ: rusiye , s-400 , nato , türkiye

مۇناسىۋەتلىك خەۋەرلەر