تۈركىيە ئىسانپەرۋەرلىك ياردەمدە دۇنيا بويىچە بىرىنچى بولدى

تۈركىيە ئاۋازى رادىيوسى خەۋىرى: مەركىزى ئىشخانىسى ئەنگلىيەدە تۇرۇشلۇق تەرەققىيات ئۈستۈنلۈكى تەشكىلاتى دۇنيادا ھەر يىلى قىلىنىۋاتقان ئىنسانپەرۋەرلىك ياردەملەرنى ھېسابلاپ چىققان بولۇپ، 2018 - يىللىق دۇنيا مىقياسى ئىنسانپەرۋەرلىك ياردەم دوكلاتىدا، تۈركىيەنىڭ ئالدىنقى يىلى 8 مىليارد 70 مىليون دوللارلىق ياردەم قىلىش بىلەن دۇنيا بويىچە ئەڭ كۆپ ئىنسانپەرۋەرلىك ياردىمى قىلغان دۆلەت بولغانلىقى تەكىتلەندى.

رەت بويىچە تۈركىيەدىن قالسىلا 6 مىليارد 680 مىليونلۇق ياردەم بىلەن ئامېرىكا ئىككىنچى، 2 مىليارد 990 مىليون دوللارلىق ياردەم بىلەن گېرمانىيە ئۈچىنچى، 2 مىليارد 520 مىليون دوللارلىق ياردەم بىلەن ئەنگلىيە تۆتىنچى، 2 مىليارد 240 مىليون دوللارلىق ياردەم بىلەن ياۋروپا ئىتتىپاقى بەشىنچى بولدى.  

تۈركىيەنىڭ ئىنسانپەرۋەرلىك ياردەملىرى دۆلەت ئومۇمىي كىرىمىگە سېلىشتۇرغان ئاساستا رەتكە تىزىلغىنىدا، %0.85 بىلەن بىرىنچى بولدى. ئارقىدىنلا رەتكە تىزىلغان نورۋېگىيە ۋە لىيۇكسېمبۇرگ %0.17 بىلەن ئىككىنچى ۋە ئۈچىنچى بولدى.  

ئامېرىكا بولسا، دۆلەت ئومۇمىي كىرىمىگە سېلىشتۇرغاندا، %0.04 بىلەن 19 – ئورۇنغا چۈشۈپ قالدى.

تۈركىيە 2013 -، 2014 – ۋە 2015 – يىللىق خەلقئارالىق دوكلاتتىمۇ 3 يىل ئارقىمۇ ئارقىدىن دۇنيا بويىچە ئەڭ كۆپ ئىنسانپەرۋەرلىك ياردەم قىلغان ئۈچىنچى دۆلەت بولغان ۋە يېقىنقى 2 يىل بويىچە ئىككىنچى بولغان ئىدى.