әрдоған: бәзи дөләтләр қош өлчәмлик позитсийәдин ваз кечиши керәк

җумһур рәис рәҗәп таййип әрдоған бәзи дөләтләрниң терроризмға қарши  күрәшкә қош өлчәмлик позитсийә тутуштин ваз кечиши лазимлиқини ейтти.

әрдоған: бәзи дөләтләр қош өлчәмлик позитсийәдин ваз кечиши керәк

түркийә авази радийоси хәвири: җумһур рәис вә адаләт вә тәрәққийат партийәси рәһбири рәҗәп таййип әрдоған партийәсиниң баш мәркизидә берилгән әнәниви баш әлчиләр иптар зийапитидә қилған сөзидә, түркийәниң террорлуқ тәшкилатлириға қарши изчил күрәш қиливатқанлиқини, буниң наһайити зор әһмийәткә игә икәнликини әскәртиш билән бир вақитта,  бәзи дөләтләрниң терроризмға қарши  күрәшкә қош өлчәмлик позитсийә тутуштин ваз кечиши лазимлиқини тәкитләп мундақ деди: «бөлгүнчи террорлуқ тәшкилати п к к вә униң сүрийәдики гумаштиси п й д/й п г, даеш вә әлқаидә  һәмдә әң муһими йеңи әвлад шалғут террорлуқ тәшкилати болған фәтһуллаһчи террорлуқ тәшкилатиға қарши изчил  күрәш қиливатимиз. бирақ, бәзи дөләтләрниң терроризмға қарши  күрәш мәсилисигә қош өлчәмлик позитсийә тутуватқанлиқиниму әпсусланған һалда ейтишқа мәҗбурмән. әң йахшиси, бу дөләтләр  терроризмға қарши  күрәшкә қош өлчәмлик позитсийә тутуштин ваз кечишлири лазим.»

террорлуқ тәшкилати даешқа кәлгәндә гөркирәп авази чиқидиған бәзи күчләрниң, п к к вә униң гумаштилири билән фәтһуллаһчи террорлуқ тәшкилатиға кәлгәндә сүкүт қилидиғанлиқи вә җимип кетидиғанлиқини әскәрткән җумһур рәис әрдоған мундақ дәп көрсәтти: «һәтта бәзи дөләтләрниң п й д/й п г мәсилисидә тутуватқан позитсийәлири бу террорлуқ тәшкилатиниң хәлққә техиму көп зулум селиши вә бесим ишлитишини қоллаш позитсийәлиригә айлинип кетиду. буниңдин башқа йәнә, террорлуқ тәшкилати п к к ниң латилири узун йиллардин буйан ғәрб әллиридә әркин – азадә һалда ишлитиливатиду,  охшашла баш террорчиниң рәсимиши чүшүрүлгән латиларму чәклимисиз һалда ишлитиливатиду, террорлуқ тәшкилати бесим ишлитиш вә тәһдит селиш арқилиқ пул йиғиш қиливатиду. террорчилар ғәрб дөләтләрниң пайтәхтлиридики әң ават мәркизий мәйданларда әркин – азадә һалда   террорлуқ тәшвиқатлирини елип бериватиду. бундақ ишлар фәтһуллаһчи террорлуқ тәшкилати унсурлири үчүнму күчкә игә.»

йавропадики көплигән дөләтләрниң қоллири мәсум кишиләрниң қени билән бойалған қатиллар үчүн адаләттин қечип панаһлинидиған бихәтәр портларға айлинип қалғанлиқини қәйт қилған җумһур рәис әрдоған мундақ деди: «һечким әйибкә буйрумисун, террорлуқ тәшкилатлириға қарши  күрәштә бундақ икки йүзлимичилик қилғанда, һечқанчә илгириләш һасил қилғили болмайду. алди билән, террорчиға террорчи дейиш, андин террорчилаға қарши бирликтә  күрәш қилиш шәрт. бундақ вәһимилик мәнзирә алдида, түркийә өз истиқбалиға хирис қиливатқан тәһдитләрни үзүл - кесил бир тәрәп қилиш үчүн өзигә хас тәдбирләрни алмақта.»



مۇناسىۋەتلىك خەۋەرلەر