әрдоған, түркийә - боснийә - гертсеговина мунасивәтлириниң мукәммәл дәриҗидә икәнликини ейтти

түркийә авази радийоси хәвири: җумһур рәис әрдоған боснийә – гертсеговинадики бир күнлүк дөләт ишлири зийарити җәрйанида, хәлқара сарайево университети тәрипидин берилгән пәхрий докторлуқ унванини тапшуруп елиш мурасимиға иштирак қилди. у, 3 йиллиқ сеғиништин кейин қайтидин сарайевоға кәлгәнлики үчүн хушаллиқ һес қилғанлиқини билдүрди вә өзигә пәхрий докторлуқ унвани бәргән хәлқара сарайево университетиға рәһмәт ейтти.

боснийә - гертсеговина пирезидентлиқ кеңиши башлиқи бакир иззәтбегович билән айрим вә һәйәтләр ара учришишларни өткүзгәнликини билдүргән әрдоған, боснийә - гертсеговина министирлар кеңиши башлиқи дәнис звиздиҗ вә министирлар кеңиши министирлири билән икки дөләт арисидики һәмкарлиқ пиланлири тоғрисида сөзләшкәнликини қәйт қилди.

учришишларда, иқтисадтин маарипқичә, сайаһәтчиликтин мәдәнийәткичә болған барлиқ саһәләр тоғрисида муһакимә йүргүзүлгәнликини тилға алған әрдоған, икки дөләт арисидики мунасивәтләрниң мукәммәл дәриҗидә илгириләватқанлиқини, бу мунасивәтләрни техиму йуқири пәллигә көтүридиғанлиқлирини әскәртти.

әрдоған, түркийәдә боснийә – гертсеговинадикидинму көп бошнақ, албанийә нопусидинму көп албан барлиқини ейтти.

«түркийәниң асасән һәммила шәһиридә балқан райони, кавказийә, түркистан җуғрапийәсидин кәлгән қериндашлиримиз йашайду» дегән җумһур рәис әрдоған, «балқан әллири билән чеграсиму йоқ дөләтләр, түркийәни балқан районидики бир рәқиб күчтәк қилип көрситишкә урунмақта» деди.

бошнақлар билән бирликтә серипларни, һирватларни, албанларни вә македонларниму бағриға бесишни давамлаштуридиғанлиқлирини тәкитлигән әрдоған, йеқинқи мәзгилләрдә бу йолда наһайити муһим қәдәмләрниң ташланғанлиқини сөзлиригә илавә қилди.