erdoghan seudi erebistan padishahi bilen téléfonda körüshti

jumhur reis rejep tayyip erdoghan seudi erebistan padishahi selman bin abduleziz bilen téléfonda körüshti.

erdoghan seudi erebistan padishahi bilen téléfonda körüshti

türkiye awazi radiyosi xewiri: jumhur reislik sariyi menbelirining bildürüshiche, téléfon uchrishishida, ikki rehber türkiye – seudi erebistan munasiwetliri, süriye kirizisi toghruluq söhbet élip barghan. erdoghan selmangha türkiyening süriyening afrin rayonida térrorluq teshkilati unsurlirigha qarshi élip bériwatqan «zeytun shéxi» herbiy herikiti toghruluq melumat bergen.

afrin rayonida térrorchilar teripidin öy – makanlirini terk étishke mejbur qilinghan ereb, kord we türkmenlerningmu «zeytun shéxi» herbiy herikitini qollawatqanliqini eskertken erdoghan, herbiy heriketning yerlik xelqlerningmu öy – makanlirigha qaytishida muhim rol oynaydighanliqini qeyt qilghan.

erdoghan bilen selman süriyening zémin pütünlüki we kirizisni siyasiy yollar arqiliq hel qilishqa nahayiti zor ehmiyet bériwatqanliqlirini, bu dairide ortaq tirishchanliq körsitish hem hemkarliqni yenimu kücheytishning zörürlükini tekitleshken.

selman jenwe basquchi we xelqara jemiyetning  süriye kürizisini hel qilish yolida  körsitiwatqan tirishchanliqlirini qollawatqanliqlirini éytqan, erdoghan bolsa, astana basquchi we sochi yighinini jenwe basquchining ayrilmas bir qismi dep qaraydighanliqlirini eskertken.

her ikki rehber türkiye - seudi erebistan munasiwetlirini téximu tereqqiy qildurush iradilirining qetiylikini tekitleshken.

uchrishishta, bash ministir binali yildirimning dékabirda seudi erebistangha qilghan ziyaritining muweppeqiyetlik bolghanliqimu qeyt qilinghan.

jumhur reis erdoghan bilen padishah selman ilgiri birdeklik hasil qilinghinidek, seudi erebistan text warisi shahzade muhemmed bin selmanning aldimizdiki mezgilde türkiyege qilidighan ziyaritining, ikki tereplik we rayonluq mesililerni chöridigen halda özara pikir almashturush jehettin nahayiti zor ehmiyetke ige ikenlikini eskertishken.



مۇناسىۋەتلىك خەۋەرلەر