erdoghan girétsiye bilen jenubiy qibrisni qattiq agahlandurdi

jumhur reis rejep tayyip erdoghan jenubiy qibris rum hakimiyiti bilen girétsiyeni qattiq agahlandurdi.

erdoghan girétsiye bilen jenubiy qibrisni qattiq agahlandurdi

türkiye awazi radiyosi xewiri: jumhur reis, adalet we tereqqiyat partiyesi rehbiri rejep tayyip erdoghan partiyesining türkiye büyük millet mejlisidiki guruppa yighinida qilghan sözide,  jenubiy qibris rum hakimiyitining aqdéngizda öz aldigha tebiiy gaz qidirip tekshürüsh paaliyetlirige, girétsiyening ege déngizidiki depsendichiliklirige qattiq naraziliq bildürüp hem agahlandurush bérip: «heddinglardin ashmanglar» dédi.

erdoghan jenubiy qibris rum hakimiyitining sherqiy aqdéngizda shimaliy qibris türk jumhuriyitining heq – hoquqlirini depsende qilip öz aldigha tebiiy gaz qidirip tekshürüsh paaliyetlirige, girétsiyening yéqindin buyan ege déngizidiki qiyaliqlargha alaqidar depsendichiliklirige qattiq naraziliq bildürüp mundaq dédi: «bashqilar özlirining qibris déngiz tewelikide tebiiy gaz qidirip tekshürüsh paaliyetliri we ege déngizidiki qiyaliqlargha alaqidar pursettin paydilinish teshebbuslirini diqqitimizdin qachidu dep oylap qalmisun. meyli qibrista bolsun, meyli ege déngizida bolsun, heddidin ashqanlarni chotni xata soqmasliqi toghruluq bu yerdin agahlandurimiz. türkiye tarixtin buyan izchil dawamliship kelgen, kélishimler we xelqara qanungha saslinidighan heq – hoquqlirini adaqqiche jan tikip qoghdaydu.»

türkiye armiyesining süriyening afrin rayonida dawamlashturuwatqan «zeytun shéxi» herbiy herikiti toghriliqmu toxtalghan erdoghan mundaq dep körsetti: «bizning süriyediki, afrin rayonidiki heq – hoquqlirimizni qoghdash qandaq muhim bolsa, ege déngizidiki we qibristiki heq – hoquqlirimizni qoghdashmu shundaq muhimdur.»

rayondiki özgirishlerni yéqindin közitiwatqanliqlirini eskertken erdoghan sözlirige munularni ilawe qildi: «urush paraxotlirimiz, hawa armiyemiz zörür tépilghanda her türlük mudaxile qilish üchün weziyetni yéqindin közetmekte.»



مۇناسىۋەتلىك خەۋەرلەر