чавушоғлу: түркийә - америка мунасивәтлири, сүрийә вә ирақ вәзийити тоғрисида тохталди

түркийә җумһурийити ташқи ишлар министири мәвлүт чавушоғлу, америка қошма иштатлириниң фәтһуллаһчи террорлуқ тәшкилатиға тутуватқан позитсийәсини әйиблиди.

чавушоғлу: түркийә - америка мунасивәтлири, сүрийә вә ирақ вәзийити тоғрисида тохталди

түркийә авази радийоси хәвири: мәвлүт чавушоғлу америкиниң лос анжелес шәһиридә түркийә пуқралири билән учрашқанда сөз қилип, «фәтһуллаһчи террорлуқ тәшкилатиниң қандақ хаин тәшкилат икәнликини пүткүл дунйа чүшәнди. иншааллаһ, америкиму буни бир күни чүшинип қалар. әпсуски биз һазирғичә америкидин тәләп қилған қоллашни көрәлмидуқ. қайтуруп бериш тоғрисидики тәләплиримиз әмәлийләшмиди, һазирғичә бир тәкшүрүшму башлимиди» деди.

чавушоғлу түркийә – америка мунасивәтлиридики сақлиниватқан мәсилиләр тоғрисида тохтилип мундақ деди: «америка қошма иштатлири бизниң әң муһим иттипақдашлиримизниң бири. бәзи мәсилиләрдә пикир охшимаслиқимиз вә мунасивәтлиримиздә егиз – пәсликләр болуши мумкин, бирақ, бу фәтһуллаһчи террорлуқ тәшкилати мәсилиси билән америкиниң п й д ға қорал бериши мәсилиси түпәйли мунасивәтлиримиздә соғуқчилиқ бар. буларниму дийалог йоли арқилиқ һәл қилишқа тиришиватимиз. икки күндин кейин ванковерда америка билән бирликтә иштирак қилидиған йиғинму корейә урушидин кейин аримизда орнатқан иттипақдашлиқимизниң бир ипадисидур.»

мәвлүт чавушоғлу сүрийәдики өзгиришләр тоғрисида тохтилип, «сүрийәдә өткән йилларда изчил һалда қәтлиамларниң йүз бәргәнлики тоғрисида гәп қилаттуқ, бирақ, 2017 – йили болупму астана мусаписи вә ташлиған қәдәмлиримиз сайисида нөвәттә сүрийәниң шараити хелила йахши. пүтүнләй йахшиландиму, йақ. сийасий чарә тепилмай вә сүрийәдә муқимлиқ орнатмай туруп (пүтүнләй йахши) болмайду. әмма, йахши тәрәпкә қарап кетиватимиз. сийасий мусаписигә мәркәзләштуқ. түркийә бу йәрдә баш ролни алмақта» дегәнләрни қәйт қилди.

сөзи җәрйанида ирақниң нөвәттики вәзийитигә алақидар нуқтиларға ишарәт қилған чавушоғлу, «ирақтики сақлиниватқан мәсилиниң һәл қилиниши үчүн, һәр икки тәрәп биздин мурәссәләштүргүчи болушимизни тәләп қилмақта. районлуқ һөкүмәт еғир хаталиқ садир қилди, хаталиқини билди, әмма ирақниң муқимлиқи вә чегра пүтүнлүки бизгә нисбәтән муһим. мушу айниң 21 – күни бағдадқа баримән. иншааллаһ, түркийә бу мәсилиниң һәл қилинишидиму муһим рол ойнайду. бизниң йошурун пиланимиз йоқ, һечкимниң земинида нәзиримизму йоқ. биз йақлайдиған нәрсә адаләт» дәп сөзлирини ахирлаштурди.

министир чавушоғлу, лос анжелестики хизмәтлирини ахирлаштуруп, канаданиң ванковер шәһиридә чақирилидиған шималий корейә темилиқ ташқи ишлар министирлири йиғиниға иштирак қилиду вә йиғин җәрйанида америка ташқи ишлар министири рекс тиллерсон билән айрим учришиш өткүзиду.



مۇناسىۋەتلىك خەۋەرلەر