chelik: nato manéwiridiki setchilik fethullahchilarning heriket usuligha bekla oxshaydu
yawropa ittipaqi ishliri ministiri ömer chelik, shimaliy atlantik ehdi teshkilati – nato manéwiridiki «atatürk we erdoghan düshmenliki» setchiliki toghrisida bayanat berdi.
türkiye awazi radiyosi xewiri: yawropa ittipaqi ishliri ministiri ömer chelik, shimaliy atlantik ehdi teshkilati – nato manéwiridiki «atatürk we erdoghan düshmenliki» setchiliki toghrisida bayanat bérip, «bu ishning yüz bérish usuli fethullahchi térrorluq teshkilatining usuligha bekla oxshaydu» dédi.
ministir ömer chelik, kanadada ötküzülgen 9 – nöwetlik halifaks xelqara xewpsizlik munbiri yighinining axirqi künide muxbirlarning küntertipke alaqidar soallirigha jawab berdi. u, ünümlük ötken mezkur yighinda amérika qoshma ishtatliri bilen bolghan munasiwetler, köchmenler mesilisi we yipek yoli dégendek mesililerningmu muhakime qilinghanliqini bildürüp, «bu qétim islam bilen térrorluq ibarisining birlikte ishlitimesliki kéreklikining, térrorning héchqandaq bir din bilen, islam bilen munasiwetleshtürülmesliki lazimliqining köp qétim tekitlengenlikini körduq. elwette, bu xushallinarliq bir ish» dédi.
ömer chelik, nato bash katipi yéns stolténbérgning nato manéwiridiki «atatürk we erdoghan düshmenliki» setchiliki üchün her qétim uchrashqanda bir qétim kechürüm sorighanliqini, bundaq bir ishni qobul qilishning mumkin emeslikini éytqanliqini, özining buninggha jawaben, bihörmetlik qilishning héchqandaq shekilde qobul qilinmaydighanliqini we kechürülmeydighanliqini tekitligenlikini bildürdi we sözini dawamlashturup, «weqeni sadir qilghan memuriy xadim jazalinishi lazim» dédi.
«buning bir qomandanliq zenjiri yoqmu? buning mesuli yoqmu?» dégen soallarni sorighan ministir chelik, bularning tekshürülüshi kéreklikini alahide tekitlidi.
u, buninggha oxshash ehwallarning qayta sadir bolmasliqi üchün, weqeni yéqindin teqib qilidighanliqlirini eskertti we bu setchilikning yüz bérish sheklining fethullahchi térrorluq teshkilati paydilanghan usulgha nahayiti bek oxshaydighanliqini tekitlep, «bar – yoqini türkiyege ziyan sélish, türkiyede bir qatar selbiy haletlerni shekillendürüshke serp qilishmaqta. bu ularning usuligha bekla oxshaydu» dégenlerni qeyt qildi.
