erdoghan 231 adem ölgen térrorluq hujumini qattiq eyiblidi

jumhur reis rejep tayyip erdoghan, tünügün somalining paytexti muqdishoda meydangha kélip, 231 adem hayatidin ayrilghan bombiliq hujumni eyiblidi.

erdoghan 231 adem ölgen térrorluq hujumini qattiq eyiblidi

türkiye awazi radiyosi xewiri: jumhur reis erdoghan hujumdin kéyin somali pirézidénti muhemmed abdullah fermajugha télégramma yollap, térrorluq hujumida köp sanda ademning hayatidin ayrilghanliqi we yarilanghanliqidin chongqur qayghurush ichide xewer tapqanliqini eskertken halda, «somalining muqimliq we bixeterlikige ziyan yetküzüshni nishan qilghan bu hujumni eng küchlük shekilde eyibleymen. türkiye, térrorizmgha qarshi somali hökümiti we qérindash somali xelqi bilen hemkarliq ornitishni dawamlashturidu. bu dairide, jiddiy qutquzush ayropilani we tébbiy lazimetlikler bilen teminlesh, buningdin bashqa yaridarlarning türkiyede dawalinishi üchün her türlük yardemni qilish toghrisida yolyoruq chüshürdum» dégenlerni qeyt qildi.

jumhur reis rejep tayyip erdoghan, xainlarche hujumda hayatidin ayrilghanlargha allahtin rehmet, yarilanghanlargha téz shipaliq tilidi, somali hökümiti we xelqige teziye bildürdi.

bash ministir binali yildirimmu somali bash ministiri hesen eli keryege teziye télégrammisi yollidi.

bu jeryanda, türkiye sehiye ministiri ehmet demirjan, somaliliq emeldarlargha hemdem bolush we dawalash üchün türkiyege keltürülidighan yaridarlarni yötkesh xizmitining süritini ashurush üchün bügün kéche somaligha baridu. sehiye ministirliqining bu heqtiki bayanatigha qarighanda, ministir demirjanning somaligha qarap yolgha chiqishidin ilgiri bir herbiy ayropilan bilen kéreklik dora, tébbiy lazimetlik we kespiy doxturlar rayongha ewetilgen.

ministirliq yene, ete kechte türkiyege keltürülüshi kütülüwatqan 50 yaridarni dawalash üchün, oxshash bolmighan doxturxanilardiki orunlashturushlirini tamamlidi. jiddiy sehiye xizmetliri bash idarisimu, somalidiki yaridarlarni türkiyege yötkesh üchün 16 kishilik heyet teshkillidi.

somali sehiye ministirliqining bashqurushi astida xizmet qiliwatqan rejep tayyip erdoghan telim – terbiye tetqiqat doxturxanisidimu hujumda yarilanghan 200 kishi balnistqa élindi.



مۇناسىۋەتلىك خەۋەرلەر